由攻讀心理學，到成為教育心理學家，李穎昕(Michelle)立志要幫助香港學童，讓小朋友健康成長。由幫助學童的教育心理學家，變成親力親為的新手媽媽，在她第一次以母親的身份迎接母親節的時候，她分享成為媽媽的育兒心得，希望為各位媽媽帶來一點力量與鼓勵。
教育專家變新手媽媽
剛剛升級成為媽媽的Michelle，從小就熱衷於與小朋友互動，更曾經想成為教師。幫助他人、教導小朋友都為她帶來滿滿的成功感。接觸心理學之後，她就一心以成為心理學家為目標，「呢個職業正正融合咗幾樣嘢，又可以教書，又可以同小朋友相處，又可以幫助別人，呢幾嘢加埋令我想成為一個兒童心理學家。」
Michelle分享，她是在接觸臨床心理學的時候，發現到兒童臨床心理學，又再慢慢了解到原來兒童心理學亦可分為「臨床心理學」及「教育心理學」兩種，然後就找到最適合自己的行業。
「教育心理學家其實除咗會幫有困難嘅小朋友，仲可以幫所有嘅小朋友加強各方面能力，我哋稱之為『發展性』。」Michelle解釋，教育心理學的獨特之處是有發展性、補救性、預防性輔導三方面輔導治療，可以全方位幫助小朋友發展及成長。而當她初入行成為教育心理學家時，大概也未曾想過，教育心理學又能為她人生帶來如此大的幫助及影響。
初為人母最重要看「關係」
Michelle於3月誕下一對龍鳳胎，成為人母不到數月，問到她過往的教學經驗有否幫助到她，她笑言：「我學到嘅心理學知識宜家未用到上場，照顧初生BB要做嘅係餵奶、換片，反而我覺得自己宜家好似乜都唔識咁。」
Michelle笑指，她可能被認為會是一個「育兒專家」，但心理學是育兒的「軟件」幫助，而她現在首要解決的，是育兒的「硬件」挑戰。不過，她補充，目前最有用的知識是她牢牢記住了，要給予寶寶「安全感」。
安全感的背後，Michelle認為與「關係」兩字密不可分。她認為：「我自己（媽媽）身心健康、我同老公關係好、我同小朋友關係好，呢三個就係畀bb最大嘅禮物。」
「（媽媽）永遠要擺自己喺第一，係我自己睇症得出嘅道理，好多家長都筋疲力盡，其實連小朋友都會擔心佢哋，假如爸爸媽媽都有焦慮、抑鬱，其實好影響小朋友，呢個都算係工作帶畀我嘅一個反省。」
常見迷茫港童 背後皆因欠缺「學習動機」
Michelle見到好多家長都習慣幫子女決定一切，她反而希望讓小朋友適時做主導。有很多家長以為，愛子女就要幫他們安排所有事情。「但其實唔係，好多時候如果小朋友可以自行做決定，會感受到父母嘅尊重，都好利佢嘅發展。」
她分享到一個印象深刻的中六學生個案，因為遇到選修困難，就去找Michelle求助。於是Michelle讓他列出他認識的職業。「跟住佢係數唔到20個俾我聽，咁你諗下，當佢職業都數唔到20個嘅時候，佢揀嘅職業好大機會係揀錯，或者選項係好受限。」
「其實係好多學生都好迷茫，即係唔知自己要做乜。小學生就話畀我聽唔知點解要讀書，中學生又話唔知點解要考Dse、要攞好成績……原來學習動機呢一樣嘢真係比較少人關注。」所以她更希望培養學生獨立思考能力，找到自己快樂和幸福的道理。
不止母親節要愛媽媽 媽媽每日都要自愛
小朋友發展絕對是育兒一大重點，Michelle一直強調學習動機又與親子關係密不可分。藉著母親節，Michelle希望媽媽們都了解到自己對子女的影響極大，她感嘆：「當我做咗媽媽之後，我真係好敬佩所有媽媽，因為真係好唔容易，所以好希望每位媽媽都知道有人欣賞佢哋，明白佢哋嘅辛勞係有人睇到。」
「希望媽媽們記住照顧自己。」Michelle指，她過去見過不少個案，媽媽都十分辛苦，食飯只吃兩口，長期睡眠不足，各種壓力下使媽媽身心俱疲，卻不是最好的育兒之道。她再三強調：「希望媽媽記住，唔係你用所有時間精力去照顧小朋友就代表你係個好好嘅媽媽，你都要休息充足、狀態好嘅狀態下同小朋友溝通，咁先可以發揮媽媽非常重要、關愛仔女嘅角色。」
撰文：何蒨雯
責任編輯：侯聖樺
