李琳琳今日在新城接受由薛家燕、范振鋒和思敏主持的節目《開心大派對》訪問，由於當時天文台正值發出紅雨警告，家燕姐十分擔心，原本打算派司機接載琳琳姐，但琳琳姐的「愛妻號」老公姜大衛（John哥）親自開車接送，令到三位節目主持十分感動，大讚琳琳姐和John哥十分甜蜜，而新城廣播總經理（節目規劃及頻道運作）朱子昭更特別在紅雨中探班為大家打氣。
對於John哥這位「愛妻號」，琳琳姐甜笑說：「其實佢都好習慣車我，所以記得就同佢講thank you，有時急住落車就唔記得。佢好照顧我，知道我嘅身體冇以前咁好，所以成日叫我『你要咁，你要咁。』例如佢開工放食飯，或者冇佢嗰場戲，佢就會打畀我，問我點呀，食咗乜嘢呀，閒話家常，又好關心我，因為我好瘦，佢叫我一定要食嘢，總之一日幾個電話，收工前都會打返嚟『我返嚟喇！』。」
提到琳琳姐早前復出接拍電影《從今以後》，奪得柏林影展泰迪熊獎，琳琳姐大讚導演楊曜愷，她說：「導演花了好多心思，好多部門都好到位，實至名歸！」她又指家人已經看過，John哥大讚故事十分寫實，大女姜依蘭和女婿曹永廉亦很喜歡，不過細仔姜卓文（細John）似乎帶點疑問，琳琳姐笑說：「喺戲入面，最後我同區嘉雯有少少嘴唇接觸，佢就問我『媽咪，你拍嗰陣時有咩感覺？』，佢覺得我同區嘉雯本身唔認識，大家做呢個動作，會唔會有尷尬，因為佢希望喺演藝圈試吓有冇得發展，我話畀佢聽，做呢行，收到劇本，就要做好演員嘅責任；其實就算劇本冇寫，喺嗰一刻，我都會咁做，我望到區嘉雯嗰對眼，已經覺得佢對我喺心入面有幾疼錫。（始終難免會有心理關口？）我又真係冇喎，或者我講得白啲，當時嘅情景真係令到我全程投入，好自然咁望住佢，我就已經想摸吓佢塊臉，輕輕錫佢一啖，喺戲入面，冇好人與壞人，冇正派反派，每個人都係為自己著想。」
對於早前有指細John與女友CC拉埋天窗，琳琳姐立即澄清，「唔係，只不過係佢哋幫一間婚紗店影相，唔係佢哋辦喜事，如果係，我都高興，不過而家我唔係好贊成住，因為佢（細John）而家應該要有佢嘅事業，發展穩定，先至可以養妻活兒吖嘛，所以我覺得仲未到呢個階段。」對於CC這位未來新抱仔，琳琳姐讚不絕口，「前兩日都有一齊食飯，我哋去睇首映、金像獎，佢都有一齊參與，我都好鍾意佢，因為佢係一個好得體、好大方、好錫我嘅女仔，佢好識同我溝通，我亦都係一個好開通嘅女性，所以我哋相處得好好。」
