「順嫂」梁葆貞今天（5日）現身新城知訊台，接受台長程凱欣主持的《原來生活好快樂》訪問，在節目中詳談入行多年的感受。訪問結束後，葆貞姐接受《新城八大家》訪問，表示自己已退休多年，並無意復出幕前，仲公開大讚娛樂圈的兩位偶像。
葆貞姐形容退休生活似候鳥
久未露面的葆貞姐早已退休，很久沒有亮相幕前的葆貞姐笑言，機緣巧合才會來新城廣播做嘉賓，雖然葆貞姐早已移民加拿大，給人錯覺很難會見到她，但其實每年葆貞姐也會回香港一次，她笑說：「我好似隻候鳥咁，加拿大凍我就返嚟。我呢度（香港）有仔有新抱，咁我個女同孫又喺加拿大，咁我就好似候鳥咁，兩邊飛。」
87歲葆貞姐保養得宜 Keep得好竟然冇秘訣？
現年87歲的葆貞姐看下去只像60多歲，亦會跟緊潮流擺出韓式心心大方任影相當有活力。提到葆貞姐的養生心得，她直言沒有秘訣：「其實三高我有兩高，血糖高同膽固醇高，所以我唔係健康，有時都難免，始終食咗咁多年嘢。（覺得自己Keep得好好？）我唔識養生之道，我從來唔燉嘢食，所以我食嘢好普通，我唔會食人蔘同燕窩之類。咁運動我都會做下，手部運動打牌啦，同埋會喺加拿大屋企附近行。」
葆貞姐無意復出幕前 拍劇只為養家人
提到闊別幕前多年，現時過著退休生活的葆貞姐直言，無意再復出幕前拍劇：「我冇戲癮，我做戲為搵食，又要供啲仔女讀書。我冇好想出鏡，而家訪問多個人知、少個人知，對我都冇影響，我都唔做呢行，我冇咩興趣呢啲活動。」
葆貞姐續說自己也年紀大了，也是不拍劇其中一個原因：「你唔可以成日Show個老樣俾人彈，為啲咩呢，仔大女大，出嚟拍會俾人話順嫂而家咁難睇。」
葆貞姐談張國榮、周潤發 視兩位為偶像
說到娛樂圈，葆貞姐坦言沒有再留意香港娛樂圈新一代，但憶起以前做演員時代，指有兩位藝人是她的偶像，分別是哥哥張國榮和周潤發，她說：「即係佢哋咁紅，但對老人家都有份尊重好Nice。哥哥見到我哋好熱情，一個咁紅嘅哥哥，當年喺TVB見到佢，佢知道我移民加拿大，然後當時又要趕入廠錄影，佢竟然手寫咗佢加拿大電話同地址，然後每一個廠搵我喺邊，再畀資料我，好感動。」
葆貞姐稱周潤發做「發仔」，她透露「發仔」這位巨星相當有心：「佢好關心我，有次見到佢，佢話我瘦咗好多，我話畀佢聽我有糖尿病，佢同我講『聽日同你睇醫生』，作為一個咁出色咁紅嘅後生仔，咁關心老人家，我好感動。」
