張蔓莎（Sabrina）、章尾而（Jamie）和GooChan昨日在新城，接受由T.MAX（海淦清）及JY主持的《Z世代咪高峰會》節目訪問。Sabrina早前推出新歌《講呀講呀》，她笑言收到fans要求她跳唱，「我睇得K-Pop多，有諗過自己喺台上跳舞嘅畫面，我覺得自己完全去唔到嗰個位，我就唔會獻醜，如果有一日練得好好先跳唱。」而GooChan的最新單曲是《5pm》，他表示做音樂時，希望大眾聽到後就認出是其作品，而其音樂才華，曾被外國人問價，洽談版權費。
至於Jamie最近亦有新作《DONT WANNA BE LIKE ME》，帶出大家勇敢做回自己的訊息，「因為我同朋友都有容貌焦慮問題，即係成日諗自己係咪肥咗？皮膚係咪差咗？我就用呢首歌寫低咗自己一啲心路歷程，亦都想話畀大家知，唔完美都冇問題。」GooChan笑說：「我都有，我係焦慮狂，成日都覺得『嘩，佢望住我，係咪因為我太樣衰？』。」
問到Jamie的容貌焦慮問題，她表示：「曾經有一段時間，為咗追求身形上嘅完美，一啲社會框架指標，當時我係超級地節食，每日食一餐，淨係食純肉類，零澱粉，維持咗一個月之後，我有焦慮、暴食症，有一日放工，見到枱面有盒飯，我控制唔到自己，係咁食，最後係要嘔番出嚟，之後我望住塊鏡喊，我就同朋友講唔開心，因為食咗盒飯好有罪惡感，朋友開解我，佢話食嘢係一件開心事。」
事後，Jamie接受《新城八大家》訪問，她表示最後要向心理醫生求診，「當時要調整心態，加上做適量運動令自己紓壓，用咗兩個月時間就好番，而家已經冇暴食症困擾。」
Jamie的《DONT WANNA BE LIKE ME》被網民大讚「好洗腦」，雖然MV早於兩個月已拍好，但她在社交平台透露，因為MV出現突然情況要刪減相關片段，重新再拍，而Jamie就要想加入甚麼新內容，於是她在兩天內親製玫瑰花連身裙。問到是甚麼突然情況？她說：「因為上一個Version嘅MV片段有好嚴重嘅重疊影像，但係又想首歌快啲出街，唔想用番舊嘅Version咁邪，所以轉咗個Concept，順便整咗條裙滿足吓自己嘅設計慾。（知道要被刪剪，係咪好唔開心？）知道已經拍咗嘅鏡頭唔出得街，其實都好沮喪，不過都好快就調整心情，諗緊點樣可以盡快解決問題。」
