祝各位媽媽母親節快樂！李琳琳日前在新城接受《新城八大家》訪問，她表示沒有特別想怎樣慶祝母親節，並笑說：「喺現今社會，我哋嘅物資都比較豐富，你想食嘢，你想出去，都好方便，日日都好豐富，日日都好似過節，我反而好享受自己一個人喺屋企食冷飯菜汁喎！」琳琳姐特別提到女婿曹永廉好有孝心，「佢好鍾意煮嘢食，又煮得好味，佢會叫依蘭（琳琳姐大女）問我想食咩，佢就好用心去煮，佢蒸魚係最好食。」
談到難忘的母親節，琳琳姐說：「我都唔記得咯，不過我以前喺溫哥華住嘅時候，依蘭好有心，佢係喺香港，特登喺溫哥華花店訂咗啲花送畀我，細女都有，但係佢哋送花，我都未有咁驚喜，最驚喜嘅係有一次，我老公（「John哥」姜大衛）喺香港，送花去溫哥華畀我，因為佢以前係未送過花畀我㗎，求婚都冇花㗎，嗰次比較驚喜。」
在2011年，琳琳姐不幸患上大腸癌，後來被發現已經擴散至淋巴，在抗癌過程中，每分每秒都會更珍惜與家人的溫馨時光，琳琳姐說：「我個人好樂觀，又唔會多愁善感，2011年我身體有cancer，我冇感覺到好驚訝，我覺得『哦，輪到我喇！』，我係咁樣嘅反應，所以我唔覺得係一件天塌下來嘅事，我覺得上天唔會特別眷顧某一個人，既然輪到我，我就去接受，接受醫生嘅意見切除腫瘤，做12次化療，每兩個禮拜入醫院吊一次針，能唔能夠醫返好，呢個可能有一個嘅定數，唔係人可以扭轉嘅局勢，我都係盡自己努力同醫生配合去醫番好。」
媽媽不幸患上癌症，身為子女總會十分擔心，琳琳姐說：「都會嘅，我啲仔女、老公好遷就我，我比較任性啲，我行我素。」
