愛回家丨譚坤倫入行13年宣布離巢 親揭出走原因

現年32歲的譚坤倫入行13年，憑劇集《愛·回家之開心速遞》飾演「IT三子」其中一員「CPU」令人印象深刻。劇中做宅男的他，曾在劇中爆肌令人眼前一亮。而近日譚坤倫在IG長文宣布完約離巢，指起初是因為衝動參加《功夫新星》才入行做演員。

譚坤倫感激副導演給予機會入《愛·回家之開心速遞》呢個大家庭

譚坤倫也參演過不少劇集，他逐一感謝願意用他拍劇的監製，最重要的是感謝《愛·回家之開心速遞》的一位副導演，譚坤倫寫道：「2018年多謝一位副導演，搵我做IT狗，其實好耐之前我就好想加入開心速遞，呢套劇集幫咗我好多，令到一個內向嘅我，慢慢打開自己，尋找演員嘅自我創作，然後得到觀眾嘅笑聲，慢慢增加咗我嘅自信心。然後多謝珍姐，監製林建祥，俾咗更多演出機會我哋，亦都好多謝編劇知道我鍾意健身，寫咗個腹肌IT男出黎，令到我終於終於有感情線，我對唔住Gigi（羅雪妍 飾），要你再發掘下一個腹肌男」。

譚坤倫冇預計過爆肌一幕會令人討論 強調離巢唔代表轉行

最後他感謝TVB這個大家庭，譚坤倫憶起當初要拍爆肌一幕，意想不到會有這麼多人留意：「估唔到當時為咗拍攝腹肌需要斷食，會有咁多報道，令到我有咁多人留意到。多謝我嘅fans，你哋咁多年一直依然到場支持，實在榮幸！我依然會繼續一直係呢個行業發展，歡迎大家揾我合作🤟🏻各位江湖再見！」

深思熟慮3年決定離巢 親揭出走原因

譚坤倫離巢這個決定坦言不是衝動，他Ig最後的hashtag指這是自己深思熟慮3年才決定的事。譚坤倫接受傳媒訪問時指因為做過一次網絡電影的男主角令他念念不忘，雖然未至於令譚坤倫想外闖，不過表示近一年工作量大減加上發揮機會不多，甚至有時候一個月只有幾天時間開工，所以認為可以外出工作吸收更多經驗。