估唔到長洲都有咁多嘢玩！三級歷史建築嘅「長洲戲院」早前以全新面貌重開，佔地超過3萬8千呎，活化後嘅「長洲戲院多元文化園區」率先以嶄新面貌呈現大家眼前，多元文化園區分為4大主題空間，結合教育、旅遊及藝術三大元素，其中唔只「1931影棚」可以俾大家體驗電影拍攝嘅樂趣，仲有多個親子工作坊，俾小朋友動動手之餘，仲可以培養小朋友嘅耐性。今次就由親子試玩員Angle帶大家體驗一下，以後去長洲又多一樣嘢玩，唔使次次都淨係去張保仔洞同東堤啦！
長洲戲院正式重開
未帶大家認識4大主題空間前，先介紹一下長洲戲院！長洲戲院係本地保存最古老，1930年代戰前戲院之一，與油蔴地戲院同期興建，獲列作三級歷史建築物，一直為長洲坊眾帶嚟66載嘅光影歲月，直至1997年先至結業。經過26年漫長勘探、復修及規劃，長洲戲院終於再次拉起銀幕！
4大主題空間
除咗戲院，帶住小朋友最啱去埋「長洲戲院多元文化園區」！4大主題空間分別有「長洲文化館」、「啞鈴資訊中心」、「1931影棚」及「銀幕大笪地」，適合一家大細體驗同打卡，有得學又有得玩！今次親子試玩員Angle就率先體驗「長洲文化館」舉辦嘅多個工作坊，仲玩埋「島聚」野外定向 App Tour！
1. 長洲文化館
長洲考古教育中心舉辦多個考古工作坊及活動，目的係加深大家對長洲歷史及文化遺產嘅認識，活動包括模擬考古沙盤發掘、石刻藝術瓦當拓印、鑽木取火體驗、及平安包工作坊等，除咗可以長知識，仲可以培養大眾對發掘文物嘅興趣！
今次親子試玩員 Angel 帶住一對5歲仔女，喺工作人員嘅指導下，體驗鑽木取火，雖然最後都無法成功鑽出火，但過程中唔只令小朋友了解到生火過程，及鑽木取火嘅歷史，仲培養到小朋友嘅耐性！
玩完鑽木取火，仲有得玩埋瓦當拓印，瓦當係指古時屋檐最前端嘅一片瓦嘅圖案部分，而拓印則係被廣泛用於複製各種文化時代嘅多種浮雕，複製石刻圖案包括古代中國及其他亞洲文化嘅石刻、世紀教堂紀念性黃銅雕刻品及美國建國以前嘅墓碑。
考古體驗完畢， Angel 就帶小朋友一齊參加平安包工作坊。工作坊為參加者提供食材及相關設備，爸媽們可以同小朋友一齊親手製作寓意吉祥嘅平安包，為國家級非物質文化遺產傳承出一分力
最後更親手為新鮮出爐嘅包子蓋上「平安」兩字，將祝福帶返屋企，留低一個非常深刻嘅「紀念品」！
2. 1931影棚
除咗一系列考古活動，一場嚟到長洲，梗係要去埋長洲影棚啦！長洲影棚以長洲戲院落成嘅1931年命名，影棚內重現包括《唐伯虎與秋香》、《法律風雲》等香港電影經典場景，大家可欣賞真實電影拍攝嘅佈置，近距離觀賞道具之餘，仲可以一嚐當演員或導演嘅滋味，體驗電影拍攝嘅樂趣。
3. 啞鈴資訊中心
對藝術文化感興趣嘅小朋友或家長，一定唔可以錯過啞鈴資訊中心！啞鈴資訊中心展出長洲戲院過百年歷史嘅手繪圖及文件紀錄，當中包括用具清單及名人墨寶等，現時展出嘅作品由本港藝術家杜煥創作，作品為竹藝飛躍《飛天麒麟》，讓大眾感受紥作之美。
4. 銀幕大笪地
玩完一輪想搵個地方休息，可以去約一萬呎大草坪嘅大笪地休息！大草坪上設有室外放映大銀幕，有時更會舉辦音樂會，或露天電影放映會，讓公眾喺廣寬嘅空間放輕一下，另外亦會播放香港演藝學院學生作品，大力推動本土香港電影創作。家長不妨帶小朋友去銀幕大笪地，喺戶外欣賞電影絕對係另一番體驗！
除咗4大主題空間，場地更設有張保仔觀景台，設置以張保仔帆船作藍本，大家可以上去放鬆Chill下，飽覽成個戲院建築之餘，仲可以遠眺長洲小島！
「島聚」Ａpp Tour
如果想嚟一個深度遊，一於下載埋「島聚」App！「島聚」App係一個結合虛擬及實境互動嘅手機應用程式，讓使用者可以一個嶄新角度重新體驗長洲傳統文化。玩家可透過「島聚」App遊戲設置嘅關卡及任務，了解長洲傳統特色及歷史悠久嘅建築物及店舖。
當日Angle同小朋友就好似玩野外定向咁，一邊使用「島聚」App，一邊依照不同嘅指示前往不同嘅景點，穿梭長洲每條街道，感受長洲每一個角落！呢個App仲可能會帶你去到從來未去過嘅小景點，例如北帝廟、長洲街坊會，唔只加深遊客對長洲文化及地理認識，更加考驗大家嘅腦袋同眼力！
長洲戲院
營業時間：上午10時-下午8時 (周一至五)
上午11時-下午9時 (周六、日及公眾假期)
電話：2155 1313
地址：香港長洲新興後街120號
入場費：$180起，各活動收費不同
網頁：https://ccccc.com.hk/
