歌手尹光今天（9日）到新城廣播接受《Ben同Benson「Chur」到行》訪問，他開心透露5月19日舉行的演唱會門票已差不多售罄，又指屆時將帶來多首新歌，更會有嘉賓楊詩敏（蝦頭）和鄭雅琪，尹光表示：「鄭雅琪會同我唱廣東小曲，好好聽；蝦頭就同我搞笑，希望大家捧場。」
尹光提到他的新歌《你阿爸的無常宇宙》由黃偉文（Wyman）填詞，並首次與Rapper蔡承恩（Billy）合唱，令他非常開心。他表示歌詞較為深奧，內容講述人生哲理，從出生到往生，希望樂迷看開一點、不要太緊張，這樣壽命會更長，他強調：「大家記住，要健康就要運動。我一得閒就打乒乓球，任達華都話想約我打，佢打得好叻！行路都好好，人最重要唔好太執著，昨天係歷史，今日係一個禮物，明天係一個謎。」
尹光認為心境開朗是健康的關鍵。他分享道：「我唱歌幾十年，今年超過八十歲，心境開朗，每樣都食多啲，個人一緊張，慢性病就會出現。醫生同我講，心境開朗，病就唔會搞你。好多人話自己有癌症，唔去理，同仔女玩，返嚟病都冇埋，原來真係可以。」
他透露自己多年來與年輕人合作，從《少理阿爸》開始一直保持活力，最近更獲歐陽萬成（Jimmy O. Yang）邀請擔任棟篤笑嘉賓，同場還有王嘉爾（Jackson Wang）與Tyson Yoshi。尹光笑言：「以我嘅知名度同佢哋爭一個天一個地，但能夠邀請到我，開心到不得了。歐陽萬成嘅爸爸同屋企人，細細個就聽我嘅歌，佢喺紅館唱咗五天，最後一場仲送咗幾張飛畀我，叫我一定要去捧場。」
尹光回憶與王嘉爾、Tyson Yoshi的互動時說：「我哋喺台上搞笑，佢哋話王嘉爾係Jackson Wang，尹光就叫Jackson Wan Kwong，又大合唱一首過年歌，希望將來有多啲機會同佢哋合作。」
