DJ科林（吳浩賢）今天（1日）正式宣布重返「娘家」新城廣播，並獲委任為「MBO TV創意及製作副總監 /節目主持（Associate MBO TV Creative & Production Director / Programme Host）」，巧合地回歸當日正值是愚人節，科林與昔日戰友兼現任「MBO TV台長及創作總監」葉文輝（啤梨）異口同聲表示：「唔係開玩笑，係認真的！」兩人更會攜手創作多個全新節目，為新城廣播注入新動力。
啤梨表示誠邀科林回歸，全因科林對新城非常熟悉：「佢過往喺呢個地方作戰咗好長時間，無論做節目，或者創意嘅嘢，科林出咗去見識咗個世界，升級咗，亦都吸收咗好多唔同嘢，佢雖然啱啱返嚟，但我哋已經籌備緊多個項目。」而科林亦開心表示：「新城係我成長嘅地方，今次回歸係希望將外面累積嘅經驗帶返嚟，希望可以幫到公司，回饋公司。」
啤梨透露科林除了參與幕後創作，亦會繼續開咪做主持，但他賣關子表示：「具體內容暫時要保持神秘。」而兩人正密鑼緊鼓創作全新節目，啤梨直言期待與科林聯手製作更多精彩作品。
科林自爆以往在公司有個花名叫「睡寶寶」，因為經常在公司工作至深夜，甚至在公司睡覺，然後翌日繼續工作。就連啤梨也表示：「以前所有《勁爆頒獎禮》嘅片都係佢搞，好犀利。」不過科林強調，今次回歸會更注重工作與身體的平衡，同時亦首度談及自己的健康狀況。
由於科林去年經歷患癌，雖已順利度過治療期，但仍處於五年的觀察期內，科林稱：「各樣療程都已經完成，所以精神上係唔錯嘅，依家會定期覆診、抽血同照CT檢查，醫生都話身體狀況幾好。」啤梨表示會以科林的身體為大前提：「我哋公司同事每個人都好好，第一時間就話『喂，就住你』，所以你好幸運，每個人都話就住你。」
圖片：新城廣播
