歌手陳曉東（東東）今天（26日）到新城廣播接受黎莉主持的《勁爆樂勢力》訪問，東東近日正積極籌備6月19日假紅館舉行的《NEON Reflections 30演唱會》，並宣傳與黃偉文（Wyman）相隔26年再度合作的新歌《致我們消失的超能力》，東東大爆歌詞其中一粒音近似粗口，但強調不太影響，同時透露演唱會周邊產品的公仔「會有嘢睇」，令人相當期待。
東東與Wyman對上一次合作是26年前的《水瓶座》，他憶述促成這次合作的經過：「其實呢首新歌係喺年前，我喺台灣跨年嘅時候發訊息畀Wyman，好想邀請佢。但嗰時佢可能未返嚟，佢有一個Apps嘅訊息唔係經常睇到，到佢返嚟嘅時候就同我講『哎呀，真係唔好意思，依家先睇到你個訊息。其實咁多年，阿東，我好想有機會，好想用心幫你寫』，所以2026年我哋把握機會一齊合作。。」
問到歌詞是否有特別意思？東東解釋新歌中文版名為《致我們消失的超能力》，內容關於每個人內在的潛能：「我哋好多時候畀生活、畀成長，好多種種就遮擋咗我哋本身天生嘅才能。其實我哋去到呢個年代，我哋應該都更加放飛一啲，放飛一啲就可以再次啟動我哋原始嘅創造力，仲有想像力，咁樣生活先唔會枯燥。」
談到錄音過程，東東透露：「只係錄音錄咗三次，淨係mixing都畀我mix咗三次。」東東在接受黎莉訪問時，大爆廣東話歌詞有一粒音近似粗口，東東哈哈大笑表示：「係呀，喺黑膠碟調節咗，同埋都派咗台，但唔影響嘅。」
東東對演唱會十分嚴謹，他透露最近找了一位女教練協助訓練：「因為對上一次嘅演唱會都係搵呢位教練，佢本身好健美，係參賽嗰啲健美小姐。」東東笑言女教練能激勵他：「叫佢糟質我，攞條皮鞭鞭我，有個美女喺旁邊可以激勵我做多啲，我冇理由會輸畀個女仔。」
另外，東東亦提到演唱會將推出周邊產品，包括一隻約十二吋的公仔。他表示公仔設計相當趣緻，更賣關子說：「除衫有嘢睇，佢哋特登幫我設計兩個腹肌，打咗個井字，真係靠害。」問到演唱會上會否「騷肌」，他笑言：「當然唔會，唔好諗太多喇，哈哈。」
圖片：新城廣播
