歌手戴祖儀今天（24日）到新城廣播接受由譚玉瑛、何基佑及麥皓兒主持的《QK玉瑛室》訪問，宣傳新歌《成長是個陷阱》，祖儀真情流露，暢談成長過程中的種種「陷阱」，除了透露小學慘受欺凌，更自爆大學時遇「渣男」，親眼目擊男友拖住一位女生。
祖儀表示《成長是個陷阱》是她人生第一首自己創作的作品，早於中學六年級時已經寫好。「嗰時係結他Demo，基本上旋律冇變過，但當時廣東話填詞水準唔夠，所以填咗普通話詞，到依家終於想推出呢首歌，就請咗甄敏延幫忙填廣東話詞。」
被問到為何會寫這首歌？祖儀憶述中學時期對學業成績極度緊張，給自己很大壓力。「我每日起身掰大眼第一件事就係溫書，合埋眼最後一件事都係溫書。數學唔係我強項，花咗好多時間溫習，有一條題目點都做唔到，最後竟然喺夢入面解答到。」她形容當時完全沒有休息時間，唯一的獎勵就是溫完書之後看《蠟筆小新》。
談及成長過程中的「陷阱」，祖儀分享小學時期被欺凌的經歷。她表示自己小學五年級時轉校，之後度過了兩年「校園欺凌」的日子。「有個『大家姐』唔畀所有人同我做朋友，我完全冇朋友。」她形容當時每日上學都像「步入地獄」，「每一次踏入校門都要深呼吸，同自己講『我要面對地獄了，OK我可以的』。」
當時年紀小小的祖儀沒有向家人求助，「細個唔識，覺得呢啲事好驚、好冇面，唔知點處理，唔敢同人講，亦都驚講咗之後佢哋會欺凌得更厲害。」她甚至每天回家都要「扮開心」，不讓父母擔心。直到後期父母得悉事件，反過來是她安慰媽媽：「我又唔係做錯事嘅人，點解我要承擔唔好嘅後果？」
雖然經歷痛苦，但戴祖儀表示今日回想，反而感恩有這段經歷。「佢令我學識關心人，我一定會顧及別人感受，因為我唔想人哋有我當年嘅感覺。第二，佢令我變得好堅強，因為無論面對咩逆境，對我嚟講都唔會比當年細個咩都唔識、仲要被人欺負更難受。」她更分享自己的領悟：「其實你最大嘅報復唔係傷害嗰個人，你最大嘅報復係令自己變得更加好，令佢哋點樣跑都跑唔到你嘅位置。」她坦言當時已經這樣想：「睇吓十年後你哋點樣。」
出道七年，祖儀坦言初入行時面對公眾評價，曾一度陷入「大內耗」。「啱啱出道嘅時候第一次面對公眾，當然會收到好多反應。人都好奇怪，總是會留意唔好嘅嘢。有一兩句唔好嘅說話，你就會即刻放喺心上。」她透露當時甚至出現驚恐症（Panic Attack）症狀，「好似呼吸唔到咁，要深呼吸」。
她承認這種感覺令她回想起小時候被欺凌的回憶，不過她表示這一兩年已經沒有再出現驚恐症，心態亦有所轉變。「我依然會睇comments，但而家識得分辯有咩需要睇、有咩唔需要睇。」被問到看到負評會如何處理，祖儀笑言：「大部分都唔理，但有時候有啲好想回覆忍唔住手嘅，我就會直接回覆，但我會用幽默感去回覆，會比較搞笑一點，唔會同人對罵。」
她更以正面態度看待Hater：「我覺得可憐人必有可憐之處，佢要發洩去鬧人，可能佢嘅生活都好唔順利。所以我會話『祝你生活愉快』、『你唔鍾意睇我就睇其他，我哋公司都有好多好節目睇』。」她續說：「雖然呢一刻你好討厭我，但可能我俾咗一啲快樂你，你都可以轉變你嘅生活模式。人生最大嘅快樂就係令人睇開啲。」
談到未來會否嘗試寫情歌，祖儀透露讀書時期曾有被背叛的經歷。「讀大學時試過被分手，拍咗兩年，親眼見到佢拖住另一個女仔。」她憶述當日正值大年初三，她與媽媽和弟弟在旺角某商場乘搭長電梯，剛好看見前度拖著另一人從商場門口進入。「嗰一刻個畫面好似化白咗咁，突然多咗一層filter，有啲缺氧嘅感覺。」
她形容自己雖然從小看電視劇幻想過如何應對這種場面，但真正發生時腦袋一片空白。「成日覺得自己會衝過去大鬧『渣男』，但原來嗰一刻你係做唔出。」為了不讓身旁的媽媽和弟弟擔心，她更裝作若無其事，直至離開商場才藉口「見到朋友」折返，但最終找不到對方，只好透過電話處理。「有哀求，都有道歉，但呢啲始終都係一次不忠百次不容。」她表示這段經歷將來亦可能成為創作素材，「又係一個陷阱，又令我成長了。」
圖片：新城廣播
