藝人袁文傑昨日（17日）到新城廣播接受羅沛琪（Pinky）主持的《寵愛您》訪問，除了分享「貓奴」心得，更提及早前出席由古巨基發起的TVB第四期藝員訓練班同學聚會；袁文傑大讚基仔5歲兒子Kuson活潑可愛兼且轉數快，遺傳了父親的演戲天份，同時又透露「失蹤人口」譚淑梅的最新近況。
袁文傑談到與認識35年的訓練班同學見面時非常開心，他回憶當年讀訓練班的情況：「當時大家都有競爭嘅心，但結果出嚟就係，可能簽咗小部分同學，大部分嘅都要離開，但係大家嘅感情一直以來都冇變過，都keep住有聯繫，係好難得，尤其見到基仔（古巨基）成就咁好。」
他透露這次聚會是由古巨基發起：「我哋諗緊一個地方聚會，結果就去咗佢屋企，佢好好呀，招呼我哋。」袁文傑笑言古巨基成為了同學當中的代表人物：「每一次有人問我，你都係訓練班？你邊一期？我好容易就解答到『古巨基那一期』，起碼有一個好代表性嘅人物講到畀大家聽。」他又笑言：「如果大家有睇到我條片，都見到我哋大致上個樣冇乜點變。」
聚會中亦看到古巨基的大兒子Kuson亦有在場，袁文傑大讚Kuson：「呢位小朋友好玩得，我諗佢都感染到爸爸好多傳承嘅天份，好活潑、轉數好快。」問Kuson是否有音樂或演戲細胞？袁文傑稱：「我暫時睇到演戲嗰部分，因為我冇聽過佢唱歌，但佢會喺某啲位，突然間畀到大家反應，仲要畀到百分之一百。你睇嗰條片，他伸個頭入嚟大叫，嗰個就已經好正喇！」
袁文傑亦提到久未露面的譚淑梅：「我睇報導先諗起佢喺《回魂夜》有個好搶眼嘅角色。其實譚淑梅當年係我哋訓練班嘅校花，佢又高又靚女。」他指除了最近的聚會，去年也曾一起去看舞台劇：「佢別來無恙，大家都好，但就唔係做呢行。」
是次聚會讓袁文傑有感而發：「今次大家都有個感覺，希望下一次唔好相隔得太耐，基仔都不斷咁講。」他提到最近其中一位訓練班導師李銘森先生離開了大家，因此感觸良多：「我成日都掛住李銘森老師，之前諗住可以再有機會約佢出嚟飲餐茶、食個飯，一直等，但等一等就冇機會。」
另外，袁文傑在節目中分享了養貓後對動物權益的關注，他表示從那時起開始留意流浪動物的消息，知道很多流浪動物在外面生活很可憐，沒東西吃，可能被車撞，甚至被人類傷害。談到傷害動物的行為，袁文傑憤怒表示：「嗰啲人係懦夫，點解咁多事你唔去做，要去傷害嗰啲動物？你可以唔理佢，可以唔畀嘢食佢，但唔好傷害佢。」他提到最近在落馬洲有超過20隻狗被人毒死的事件：「一定係人為，點會一次過？做得出呢啲事嘅人都係極度冷血。」
