舞台劇演員湯駿業日前到新城廣播接受昆頓主持的《說故事的人》錄音訪問，宣傳新歌《為自己流淚》。湯駿業談及自己如何在獨處時釋放情緒，更分享了一個關於自我認同的故事；此外，他還透露為了讓音樂接觸更多人，特意發起了一項分享流淚故事的錄音企劃。
談到「為自己流淚」這個主題，湯駿業自言也會這樣做，而且認為這是好事。「我發現人大咗，好多感受你唔會直接同人講，你去講其他人嘅事，或者講外面發生嘅事，會好容易抒發；但當你想去抒發自己，有幾多個人你真係可以好赤裸咁講畀對方聽？」
他自爆最常為自己流淚的場景是在車廂內。「可能係做完表演，然後喺車上，或者係有啲事經歷咗。我準備開車之前，就會睇吓電話，覆一啲訊息，處理完一啲事之後，我真係靜落嚟，嗰陣時我就會畀自己放空，諗吓自己嘢，有時會坐喺車廂半個鐘，然後無端端就有兩行眼淚流落嚟！」
即使是演出成功，他也有感動落淚的時候。「演出做得唔錯，然後我就會諗，點解我可以咁幸運？有咁好嘅團隊、觀眾同機會可以做到。」他形容那種感恩的眼淚經常出現，「可能細個唔會得到好多愛，或者好多自己鍾意做嘅事，但人大咗，不停自己爭取，到最後終於喺演戲上有機會做到自鍾意做嘅角色或者作品，做完之後好蠢咁將自己匿埋，覺得我好似為自己人生做咗啲咩。」
湯駿業認為在台上或在表演時，觀眾自有定斷，不需要走出來說服別人，「我覺得應該用我嘅工作去說服你，用我嘅工作去話你知我做咗咩。如果觀眾睇到嘅，就睇到；如果睇唔到嘅，就算你講幾多都係假嘅。」
為配合新歌，湯駿業在社交平台發起一個小企劃，邀請不同朋友拍片分享他們流淚的故事。受訪者包括歌手、演員，也有從事其他行業的人。「我覺得每個人嘅故事都值得被知道，可能有啲人聽到某啲人嘅故事，佢會被人鼓勵到。」
重溫節目，請於3月23日晚上十時登入知訊台《說故事的人》：https://www.metroradio.com.hk/MetroInfo/
圖片：新城廣播
