歌手關智斌（Kenny）今天（29日）到新城廣播接受程凱欣及麥卓華主持的《原來生活好快樂》錄音訪問，宣傳新歌《My Little Tinker Bell》，他透露新歌的構思源於他的另一首歌曲《永遠的彼得潘》，在彼得潘的故事中，總有小仙子Tinker Bell相伴左右，這首歌正是以此為喻，獻給身邊一直支持他的人。
Kenny表示：「我身邊其實有好多朋友、好多粉絲、屋企人，佢哋每日都畀好大嘅鼓勵同愛，就好似你身邊嘅嗰位Tinker Bell，灑下一啲『仙粉』，令我呢個原本唔識得飛嘅男生學會飛翔。」而現實中，Kenny同樣受到粉絲們熱烈的愛與支持，令他大為感動。
「當我喺演唱會唱呢首歌時，現場氣氛高漲。我望住全場觀眾舉住手燈、打開手機電筒照亮我，嗰一刻我突然覺得，嗰啲光芒真係好似『仙粉』一樣，非常震撼、非常感動。呢個現實生活中嘅時刻，令我印象深刻，所以我後嚟特登為咗呢份感受，重新返到錄音室錄呢首歌。」
此外，Kenny將於農曆年初五（2月21日）在澳門舉行演唱會，為此他需要專心閉關準備，甚至要為演出戒口：「農曆新年期間我都冇得食煎堆、年糕、蘿蔔糕，要忍口忍到初五先可以食。」
為了呈現最佳的舞台表演，Kenny早已投入密集訓練，「大家知道我個騷有好多鋼管舞、街頭健身嘅元素，呢啲真係需要長時間準備，唔可能喺演出前兩星期先練習，所以依家每日都喺到進行呢啲訓練。」
問Kenny可有相約好友蔡卓妍（阿Sa）一同健身？Kenny笑言：「有時會喺健身室撞到佢，但約埋就比較少，因為男女訓練嘅重量唔一樣，同埋女仔專練籮柚，我男仔鍾意操胸，所以好少一齊練習。」
圖片：新城廣播
