急才林敏驄(驄哥)聯同新片《觸電》梁國輝導演今日(18日)現身新城知訊台接受薛家燕(家燕姐)、范振鋒、思敏主持《開心大派對》節目訪問，家燕姐與驄哥一見面，即追驄哥收錢，家燕姐解釋：「當年拍《Captain Nancy》MV，搵咗驄哥幫手，佢好幫手自己度埋竅，佢好有諗法，我話拍得唔錯喎，我話要畀番封利是佢。點知拍完，轉頭唔見咗佢，原來返咗屋企，追咗佢五年收錢(利是)。」驄哥即笑言唔追家燕姐封利是，因為：「驚妳冇錢買戲飛。」
家燕姐問梁導演第一次同口沒遮攔的聰哥合作，係咪好麻煩，風險好高？梁導演則笑言驄哥好似鬼上身咁，拍戲時好認真，跟驄哥合作又驚又喜，更讚驄哥係哲學家及金句王。
家燕姐形容驄哥的急才為翻版梁醒波，常訓練演員轉數，驄哥話要訓練新演員腦筋靈活度，唔好似「一嚿雞」。對於《觸電》票房戲劇性急速反彈，由上畫只得五萬票房急升至目前接近二百萬，驄哥形容戲如人生，有上有落，票房一樣。並謂該片反彈，全靠口碑，他說：「一直冇驚過，一直對呢部戲好有信心，係一部好電影。」家燕姐即笑言要提醒驄哥：「而家我老人家提你，切忌驕傲！」
詳細節目內容，請重溫10月18日，下午2-3時，新城知訊台《開心大派對》節目，網址：https://www.metroradio.com.hk/MetroInfo/
圖片：新城廣播
