小妹有揸車，亦係的士常客，關鍵在於要睇有幾趕時間及計唔計得掂數，搭的士就係用錢買時間。
香港地停車場收費貴，繁忙時間排隊入停車場那種有如等運到的感覺更是費時失事，好多車主都試過泊完車還要一大段路程才到達目的地，大熱天時，行到汗流浹背，揸車反而遲到，小妹試得最多。
搭的士等同於以金錢買時間，的士真的能夠做到點對點，有時方便起上來，根本不需要特登用App叫車，只是有時因為需要過海，不想因跟不願過海的的士司機糾纏浪費時間，儘管有朋友會認為，只要你跳上車想去邊，迫使不能拒載，老實說，將心比心，假如對方真係趕交更或有急事，亦冇必要強人所難，用App叫車，願者上釣，呢個世界係追求雙贏，大家Win Win最Happy。
後生仔不肯入行揸的士甚至寧願揸巴士，起碼有固定收入，又有員工福利，更突顯的士司機高齡化的問題，科技應用視為人類解問題、醫痛點，網約車平台應科技而生，配對效率大大提升，司機和乘客都有了更多選擇，司機減少兜到攰，更節能減排。
冇比較冇傷害，有競爭才有進步。不少朋友網約叫車時更愛選擇的士而非私家車，因為的士司機普遍更熟路，掌握路況能力高，的士牌始終仍要考試。呢個世界好現實。 如果的士真係冇生存空間，早幾年Uber就唔會收購HK Taxi。
一樣米養百樣人，態度係通點。無論如何，以禮待人，到處通行，駕駛態度及待客之道並重。求財非求氣，萍水相逢也是緣，搭一程車啫，想通了就海闊天空。伸手就截到，仲要點對點，邊個夠佢方便！
