藝人關智斌（Kenny）日前（11日）到新城廣播接受黎莉主持的《勁爆樂勢力》錄音訪問，宣傳新歌《永遠的彼得潘》，是Kenny久違四年再推出廣東歌，他笑稱：「因為要宣傳新歌，所以要保持自己個樣唔變。」
問Kenny為何相隔四年才推出新歌？他直言性格隨心，當刻想到要做便立刻行動，「例如上年突然想學日文，前年學滑雪，有人話我呢個年紀唔好滑雪，蹬親好大鑊，但我貪新鮮，又有冒險精神，呢件事都幾彼得潘。」
Kenny形容彼得潘（小飛俠Peter Pan）嚮往自由自在，可以隨心隨地做自己喜歡的事，他亦慶幸父母在他的小時候，給予他足夠的自由。「我小學六年班已經周圍去，放學後要去接妹妹放學，之後買飯盒兩個人食；中學零用錢唔夠就幫人補習，又可以買遊戲機，父母畀咗我呢個空間，令我學識點同人相處。」
不過Kenny坦言人大了很難找到自在的感覺，所以他會給自己安排Me Time，讓自己可以減壓，「我幾鍾意一個人做運動、跑吓山，另外比較靜嘅Me Time係坐喺梳化睇電影，個腦唔使諗嘢，電話較靜音，有時會睇番啲舊片，好鍾意睇喪屍片，Brad Pitt嘅《World War Z》，我睇咗十幾次。」
提到新歌《永遠的彼得潘》首次跟監製陳巧威合作，Kenny笑稱對方發掘出充滿「仙氣」的關智斌，「佢搵到我一把幾出塵嘅聲音，唔係特登放輕把聲就會唱到呢個感覺，佢將我嘅仙氣帶咗出嚟。」
圖片：新城廣播
