林峯時隔9年再次在紅館開唱，由上星期四（5月22日）起舉行一連七場紅館演唱會，並邀請唔同藝人朋友作爲驚喜嘉賓。尋日去到第五場（5月26日），鍾嘉欣現身令全場粉絲尖叫四起，網民直呼「集氣成功」、「世紀CP合體」。
劇集《溏心風暴》嘅經典螢幕CP「程亮x常在心」時隔十幾年終於合體再度同台演出，阿峯同嘉欣喺舞台重聚先合唱《馴獸師之王》，唱過之後，阿峯更講出經典對白「沒有常在心的日子，第七千九百日」，掀起歌迷同一衆網民回憶殺，嘉欣由上台就已經好有觸動，最終亦忍唔住爆喊：「我哋十幾年冇見了。」阿峯貼心拎紙巾幫抹眼淚。嘉欣亦感到十分驕傲：「我見到你嘅成就，同埋諗起好多以前嘅嘢，管家仔啊。」她續說：「多謝你，多謝你帶俾觀眾咁多美好回憶。」搞到阿峯都眼濕濕，場面感人！
嘉欣仲話：「我有個夢想嘅，希望我將來有機會好似你咁樣，喺呢個台開演唱會，如果真係實現，你要做我演唱會嘉賓！」阿峯即時話：「呢個冇問題啦。」兩人仲勾手指尾作出約定。
阿峯笑言：「我知道如果我哋唔唱嗰首，你哋係應該唔會放過我哋。」二人合唱半首《心領》，前奏一起，仲播埋當年劇照，引起全場歌迷尖叫。其後，Linda唱出TVB電視劇《護花危情》主題曲《最幸福的事》。
圖片：網上圖片
