藝人強尼、岑樂怡（阿妹）和王頌茵（Kathy）日前（4日）到新城廣播接受程凱欣（Karen）主持的《原來生活好快樂》訪問，宣傳新劇《弊傢伙！我要去祓魔》，在劇中飾演「毛無邪」的強尼難得與Karen敍舊，原來強尼十多年前曾在新城廣播做過DJ，他表示：「今日舊地重遊，十幾年前每晚都主持《新香蕉俱樂部》，聽吓大家嘅心聲，做咗兩、三年。」
Karen形容強尼如今是一位全能藝人，新劇又接到一個特別角色，但強尼表示：「毛無邪呢個角色好差勁，係一個冇膊頭、凡事都犯錯、貪錢嘅人，見到都想摑兩巴嗰種。」而此劇並非講述妖魔鬼怪，強尼稱：「依家新正頭，套劇最適合一家大細睇，導演嘅說法係一個二次元、中二病、超現實，後生會覺得好啱feel，裡面亦有好多人情世故、感情嘅元素，所以我覺得咩年紀都啱睇，但呢套劇好燒腦，好啱鍾意挑戰同好有智慧嘅觀眾。」
劇中飾演新派風水玄學家的強尼，直言相信風水命理，但要去飾演這類角色卻有難度，所以拍攝前專程前往拜訪一個師傅，請教對方很多事情，Kathy表示：「好搞笑的，講佢哋個力量喺邊到嚟，原來要開一條天線，好似wifi咁，上面接通落嚟，我哋接到，下面又接上去。」
圖片：新城廣播
