向來尊重老婆、求生慾極高的38歲《中年好聲音》冠軍周吉佩（吉吉），日前忽然在社交平台貼出一條影片，片中吉嫂黃彥欣一反常態以「惡妻」姿態登場，與早前二人拍攝結婚紀念婚照中小鳥依人的形象大不同。適逢新正頭，面對如一座活火山的吉嫂，識趣的吉吉繼續開著求生mode，影片中他化身多功能老公，亦用盡家中場景，先是在廚房洗碗，再回到主人房換床單，手快腳快絕非豬隊友，似乎平日都有做開家務，愛妻號不斷更新、進化。
家頭細務做唔完！照顧一對仔女更加緊要。鏡頭一轉，他與一對仔女在飯廳排排座，咁早就開餐？No No No！做完「賓賓」，吉吉又變身「書童」陪小朋友溫習、做功課，周宅氣氛儼如自修室，莫非放完年假小朋友又要測驗考試？
瞬間平靜的讀書氣氛被吉嫂凶狠的氣場劃破，即使多功能吉吉又乖又聽話，將屋企打理得妥妥當當，仍未能平息老婆怒火，影片中她惡形惡相站在開放式廚房前，似乎準備開年，點解咁有火？鏡頭前吉吉手抱吉他，一派溫柔地自彈自唱，可惜花式做家務及唱情歌在這個非常時期都無乜效……
周吉佩在影片下留言：「當老婆心情不佳時……為咗生存，幾辛苦嘅家務都要撐住，但偶然都有失手嘅時候，後果不堪設想。我都只係為澳門站演唱會努力練習緊啫，唉，大家買飛啦！」
謎底揭開，原來一家四口全員出動為吉吉演唱會拍宣傳片，網友爭相留言大讚周太黃彥欣演技好，「好正吖！拍小劇場真係笑死呀，吉吉&吉太演技好掂呀」、「周太好靚女，今次扮惡妻犧牲太大」、「吉吉你好搞笑呀」、「拍多啲小劇場，支持周家」等等。
周吉佩自導自演的搞笑影片令周家窩居小單位曝光，亦突顯了吉吉小男人一面及吉嫂潛藏演藝細胞，繼續支持吉吉，澳門演唱會大成功。
圖片：katchau86
