視后佘詩曼（阿佘），前年憑無線劇集《新聞女王》中的「Man姐」女強人形象深入民心，如今，她再度上演商界女強人，於外購內地都市劇《麻辣商驕》（原名：今天的她們）中飾演梁清然，昨晚，劇集首播，一出場， 阿佘的女強人味道便滲透出來，以白色職業裝強勢亮相，霸氣十足，眼神中亦不停釋放著強烈的「殺氣」，令網民不禁感歎：「Man姐2.0來襲啦！」、「阿佘好正！」、「非常期待梁清然！」
阿佘亦於社交平台上載一張低頭聞著玫瑰花香，露出小女孩甜蜜笑容的劇照，並配文寫道：「一個極度清醒但又渴望愛嘅女強人「梁清然」，約定你～」不過，雖然梁清然有小女人的一面，但她工作起來，就成個Mean精上身，阿佘指鐘意劇中的角色，其中一個原因就係因為佢夠自律，善用時間，唔會嘥多1分鐘時間去做無謂嘅嘢，淨係會做有建設性嘅事。那究竟梁清然會如何係女強人同小女人之間自由穿梭及平衡自己呢？
除了角色人設及造型吸睛外，阿佘字字珠璣的對白，亦爆出不少罵人金句新高度，例如：「人的能力本來就存在高低之分，如果你覺得沒有得到我百分之百的信任，原因只有一個，你技不如人。」、「分手後女人不哭成水泡眼，是不是代表對男人不尊重？」、「為了人渣生氣長皺紋不值得。」、「你要習慣被針對，我的員工需要有自己的思考。盲目的服從權威，隨大流的人，我不需要。」、「愛情的本質，不過就是雌性哺乳動物，在找安全感。」「我覺得你和你媽媽之間，是有一條隱形的臍帶，還沒剪斷。」等。不得不講一句：「實在夠Mean！梁清然！ RESPECT！」
曾出演《慶餘年》的內地演員宋軼、李純，今次於劇中同阿佘鬥戲。三位性格不同的女主角，齊齊迎來愛情、事業與理想的重大轉變，三位「不打不相識」的新時代女性、如何打破常規、共同進退，絕對拭目以待。而老戲骨張國立，亦有份參演，為該劇增添不少色彩。
除了於劇中教識大家如何做人外，阿佘亦於社交平台同網民分享人生的智慧，新的一年，阿佘有新的得著，她說道：「希望大家喺成人嘅世界裏面，保持一顆童心。比起做一個成功嘅人，不如做一個有趣嘅人。保持對呢個世界嘅探索同創造力，為生活同工作注入新嘅靈感，用最真實同最坦誠嘅態度去面對自己，用知足感恩嘅心情去過每一日，最美好嘅東西往往就係你身邊，學習好好咁睇吓呢個世界。以上嘅都係我要好好學習嘅。有興趣嘅..一齊呀～祝2025年做個更可愛嘅自己！」
圖片：佘詩曼IG
