有一種友誼叫張敬軒王菀之。香港樂壇馳名的「靈魂伴侶」，入行便相識，伴侶彼此走過高山低谷，不會錯過對方的人生大事，包括演唱會。兩年前軒公在紅館舉行《張敬軒The Next 20 Hins演唱會》，尾場王菀之（Ivana）以皇后姿態現身任嘉賓，合唱《留白》及《高八度》，還讀出一封她手寫給摯友的親筆信：「你曾經問，如果下一世搵唔返你點算？我話你知，我會嚟搵你」。二人再擁抱場面感人，全場尖叫聲不斷。
兩年後今日，Ivana宣布明年二月再開紅館演唱會《合體–王菀之演唱會2025》，這是Ivana睽違11年的大型演唱會，日前率先聯同張敬軒一起深宵「合體」開Live。皇上皇后每次同框都不會令人失望，必定會引爆大量笑料，軒公問揚言要操fit迎個唱的Ivana：「你有冇『腹肌』？」皇后即神回：「我而家有覆你機吖！」，又有網友留言話，留意有軒公在身邊的Ivana份外有少女味。皇上皇后「合體」之威力，昨晚半夜引來萬多人觀看他們的直播，二人跟網友吹水傾偈，一邊食煲仔飯一邊唱歌，又祝福粉絲搶到他們的演唱會飛，原來兩人的門票都在昨日公開發售，一個紅館，一個澳門，卒之兩人的演唱會在翌日一開賣即搶爆。
早前Ivana貼出十年前處於最fit狀態時的照片，分別穿上紅色露肩紅裙及黑色窄身露肩裙，照片中王菀之鎖骨盡現、纖瘦輕盈，她留言寫道：「送上演唱會試造型照（2014，多謝）#條腰 #唔好再俾我見到呢條裙」，而王菀之在另一照片同樣重申是2014年的造型：「演唱會試造型照2，冇，真係冇filter（2014，唔該）明天gym starts，以呢張相+15磅為目標。係，言下之意，我比起嗰陣重咗大概 #演唱會心理前哨戰」。
距離2月紅館個唱尚餘兩個多月，Ivana笑言會努力做gym減磅，到底減唔減得切？是夜軒公難得到好友合體，深夜放毒叫齊煲仔飯、老火湯、壽包及甜品招呼皇后，美食當前，當然食咗先講，無懼澱粉質食完一碗又一碗，皇后在live中表示，「其實我真係開始有教練操練，操左三日，都係醫緊痛症，哈哈。唔知點解囉，三日都冇減到磅重增咗。」
近日迷上攝影的Ivana，於軒公唱歌時，拿相機為他拍照，但又就被軒公要求delete晒佢，軒公搶過Ivana 手上 相機 ，把她拍的照片公開鏡頭前: 「你哋睇下，嘩，delete左佢！」
軒公狂刪照片，非常搞笑。由於兩人成晚都係坐係地下唱歌，軒公於節目去到一半話坐到腳抽筋，Ivana馬上幫他按小腿又教他如何拉筋，當軒公企起身拉筋時，大家始發現他真的身體並不柔軟，不能雙手彎腰碰地，料不到Ivana卻比他柔軟得多，一彎腰就雙手到地，不過她亦有安慰對方，「其實係我天生雙手比常人長啲，哈哈。不過你真係要拉下筋啦你，估唔到我哋兩個咁就到咗唱到抽筋嘅年紀，我話咗唔好坐係地下唱㗎啦，係佢要就嗰啲美顏燈之嘛。」互窒對話非常搞笑，引發歌迷不停留言說要睇到兩人打架。
開Live到凌晨，終於唱出二人的紀念歌《友誼的小船》，還在鏡頭前有限度跳舞，逗得網友非常開心；唱到《哥歌》時，Ivana把尾段歌詞，「哥哥」兩個字改為「軒仔」，「軒仔呀軒仔呀我覺你一起，傻笑發夢頑皮，天光到天黑仍樂此不疲，朋友和伴侶最好是你。」期待他們明年二月Ivana與軒公在紅館再合體。
圖片：IG@wongyuenb
