彭家麗胞弟、TVB御用惡人彭皓鋒（Peter）確診直腸癌一年多。剛為自己慶祝54歲生日的壽星仔接受《新城八大家》訪問，由病況談到經濟狀況。「好多人都話，你邊度似生癌？」抗癌之路不孤單，但帶病在身兼要供養太太及三名子女。這頭家與這場病，他拍心口一力承擔。
本月20日Peter在社交平台貼出慶祝54歲生日照，他寫道：「發現癌症第13個月的第二個生日，珍惜和家人的每一天。」去年7月確診直腸癌第3期，由於腫瘤位置非常貼近肛門，若接受切除腫瘤手術，便會令肛門神經受損，很大機會需要「封肛」，終身背着造口袋，Peter不想成為家人負擔，亦考慮到若然要長期孭住個「屎袋」，難以參與幕前演出，故一直沒有接受手術。繼續與腫瘤共存？憑住心境樂觀與自然療法，近月病情現曙光，腫瘤縮細了1.8cm。
Peter剛完成劇集拍攝，正在休養中，他說：「演員沒工開就是休養啦！」問到開工情況，他直言腫瘤貼近肛門，令他經常有便意，「腫瘤會漲起，有嚿嘢頂住，變相成日好似有排泄物，有想去廁所的感覺，撞正開工就會就有些麻煩，要忍住。」
與腫瘤共存，不代表聽天由命。Peter採用自然療法抗癌，短短數月見成效，「去年發現腫瘤時是5.5cm，到今年一月擴大至8.8cm，之後我聽從中醫治療，乖乖地食藥，到五月份再照縮細到7cm，中醫的藥方、營養保充品對身體有幫助，加上我勤練氣功、保持心境開朗。上網睇到好多朋友分享，即使同我一樣去到第三期，確診後一樣開開心心活了十幾年，仲生存緊。」早期中西合璧治療，兩邊意見都聽，到最近大半年跟從中醫藥方。
「西醫主張電療、化療及進行切割手術，我暫時都未用得到，現階段希望用自然療法，控制癌細胞令腫瘤縮細，若然日後縮細到不影響肛門神經，沒有『封肛』需要，我可能會考慮做切割手術。
Peter坦言有財政壓力，希望透過報道，增加工作機會，這一年來醫病已耗盡他六位數字積蓄，屋企仲有三個小朋友要供書教學。「醫藥費加上家庭基本開支，每個月大大話話都要使七、八萬，雖然有親戚朋友支持，但我都要開工，趁我身體狀況OK，盡量想搵多啲錢留畀老婆仔女。」
演戲同樣是他的命根，他笑道：「在這個圈幾十年，我紅唔到，拍劇做綠葉居多，但我好享受演戲，一日仲有人搵我演戲，我都仲會繼續演落去。」下月Peter會再檢查腫瘤變化，「希望腫瘤愈縮愈細，細到有一日決定動手術，亦不會影響肛門功能，免除了『封肛』風險。」彭皓鋒的生日願望，是希望自己早康復，享受餘生。
圖片：彭皓鋒提供
