羅家英（家英哥）最近與謝曉瑩合唱中華文化節新編粵劇《馬湘蘭》主題曲《金陵幽蘭》，兩人昨日現身新城廣播，接受由程凱欣和麥卓華主持的《原來生活好快樂》訪問。
對於今次合作，謝曉瑩表示留意到戲腔流行曲，「廣州都有粵劇腔，但香港係冇，我就諗不如搞一首戲腔流行曲，當時諗到搵家英哥同我唱，因為佢係電影明星，又係我哋粵劇前輩，而呢首歌一半係流行曲，一半係粵曲。」她指家英哥接獲邀請，當時一口答應，問他事前有否向「阿姐」汪明荃（太太）詢問意見？他說：「我冇問佢，自己揸主意，我都好支持一啲新想法、新人類。」程凱欣問她本身跟家英哥是否相熟？謝曉瑩指家英哥是她的媒人。
在《金陵幽蘭》MV，家英哥透露導演要求他戴帽，他向《新城八大家》說：「頂帽係喺台灣拍戲嘅時候買，我買咗好耐，要摷番出嚟戴。（滿意呢個造型？）我自己睇永遠都唔滿意自己，要人哋睇先得。」
粵劇《馬湘蘭》將於下月假高山劇場公演，家英哥坦言擔心謝曉瑩在戲中的感情線太模糊，劇本應該如何鋪排，謝曉瑩叮囑他要入場欣賞，家英哥竟然斷言拒絕，「我就唔會睇，我驚同我要求唔同。」提到家英哥早前曾揚言不會觀看阿姐在新編粵劇《忠烈楊門》演老角佘太君，他說：「因為大家都唔得閒，一套戲要睇3、4個鐘，睇完心噏我唔想睇。」謝曉瑩接著說：「我都成日問佢做乜唔嚟睇我啲戲，佢話『唉，你知我個人，直㗎嘛，做得唔好，鬧你又唔係，唔話你個心又噏住，咁不如唔好睇！』。」
不擔心阿姐生氣？家英哥說：「佢應該唔會嬲，佢覺得我有理由，我亦都唔教佢，點解呢？因為佢應承去做，我都唔知，咁我去做佘太君，我做先㗎喎，佢應承去做，同我講聲吖，佢冇講，咁我點去教你呢？我冇身分去教你吖嘛！」謝明瑩補充：「我哋行業有個規矩，例如我老公都係呢行，佢盡量都唔出現，我覺得家英哥嘅心態，唔想畀人感覺佢喺度好似指手劃腳。」家英哥以唐佳和雪妮為例，「唐佳一路跟住雪妮，做阿四，攞櫈、攞茶、攞水，但佢係首屈一指嘅武術指導，好多武術指導都問佢『佳哥，點做？』，佢一句都唔講，淨係照顧雪妮。（你咁做得唔得？）我而家咪係做呢樣嘢，但我無需要做阿四，我喺度會影響人哋，問我咁樣啱唔啱，我講又唔係，唔講又唔係，我哋資歷大，識嘅嘢多，排咗啲戲出嚟，都唔係路，唔係咁樣呀嘛，我心係咁諗，但又唔講得出聲，以前我後生、有啲叔父都有犯呢啲錯，例如喺後台指指點點，人哋本來做嗰啲嘢，又畀佢搞到亂晒！」謝曉瑩說：「家英哥嘅做法，完全附合呢個行業嘅操守。」終於明白點解家英哥不看阿姐的演出啦！
