市場都是操控的？

有網友留言，說市場是大戶騙人的，一定有操控，為什麼銀娛（0027）疫情時可以頂住最高近80蚊，宜家可以做返生意，盈利按年大增52%，但股價反而至今腰斬一半有多？

另一個經常有網友問既問題，為什麼快手（1024）業績按年繼續高速增長，但股價同樣每況愈下？周五科技股大多有顯著升幅，惟獨快手逆市微跌呢？

很多散戶喜歡用之前股價呢個位，宜家個市升，公司仲賺多左，佢跌就一定唔啱去睇股價合唔合理。但係，股價除左反映公司即期既盈利能力，亦都反映埋市場對佢未來業績既睇法。您試想想一個極端例子，如果間公司今年每股賺10蚊，但出年同往後幾年都可能勁蝕錢，咁您覺得間公司股價宜家係廿蚊，即係兩倍市盈率，呢個係平定貴呢？

掉返轉，間公司舊年每股賺1蚊，但嚟緊每年好大機會會賺5蚊、10蚊、20蚊，盈利幾何級咁升，而家間公司股價係30蚊，市盈率30倍，又係平定貴呢？

銀娛（0027）疫情時股價可以繼續喺70蚊樓上交易，主要原因係當時市場覺得只要疫情過去，澳門博彩收益，可以回復疫前水平。但2021年後，賭場疊碼仔被取締，現在非法換錢也可能刑事化，嚟自VIP賭客既賭收預期，自然大跌。而且，內地幾年間經濟轉弱，少左房地產老板，仲有持續打貪，博彩收益就算唔再跌，預期升幅同三年前既預設相比，亦跌左一大截。所以，為什麼銀娛按年盈利升%，但股價卻遠遠不及疫情時。原因是，市場對公司未來的盈利看法改變了！

至於快手（1024），的而且確，公司近幾季業績都係由於市場預期。但係，隨着京東（9618）以及阿里（9988）等大型電商，都加入直播帶貨元素，競爭越嚟越大，市場對於快手未來嘅業務增長都存在疑問，當阿里及京東開始推進直播帶貨，而且喺最近一季似乎都交到啲成績，快手嘅股價，就係禮拜五逆市下跌。快手27倍既歷史市盈率，代表之前既股價，係市場預視公司盈利，於未來兩年都繼續高速增長。如果直播帶貨競爭大左，呢個預期有變，就算公司上半年業績不差，股價表現亦會同盈利表現背馳。

同呢個概念剛好相反，係我近日講，市場因為內地消費下行，對部份公司既盈利影響，似乎睇得過於悲觀，業績期可能會出現一段估值修復。京東係其中一個例子，由於京東主要銷售電器，房地產市場下行，對家庭電器銷售一定有影響，而市場之前就對公司業績睇得較負面，所以京東既市盈率，之前跌到落到去十倍左右。呢次業績，睇到公司努力改變以電子產品及電器為主要銷售既格局有進展，而京東物流毛利率亦能有所改善，立時令市場修訂其未來盈利預測，以周五價計算，其預期市盈率跌至約6.4倍。結果，京東股價由績前99.35元，至周五晚美國預托市場收盤價約114.2元，績後已大幅反彈近15%。

我無意在此文預測上述公司既股價短期走勢，我只想指出，公司股價反映了市場對其未來盈利前景及營運狀況的預期，而非僅僅反映當時經濟環境或該期業績。京東大反彈，亦非僅因為本期業績佳，而是市場相信公司轉營策略奏效；反之，李寧（2331）業績以零售股計，盈利下跌不多於雙位數，未算太差，亦好過市場預期。可惜，管理層預告下半年銷售應有低單位數下跌，即係條數好大機會差過上半年。所以股價周五因業績好過預期，一度大幅高開，但盈利前景預期差，最終倒跌收場。