梁釗峰昨日在新城廣播，分別接受昆頓主持的《說故事的人》、黎莉主持的《勁爆樂勢力》訪問，宣傳其新歌《致陪伴我的》。
自完成之前的「遺憾與遺憾之間的一切」企劃後，釗峰收到新晉音樂人Kudos的曲詞Demo，「發覺Demo歌詞都幾入心，寫得好，每一句都好直接，呢份詞滿足到我，所以我『全攞』，好多謝Kudos喺Demo階段，都寫到咁有氣質、咁簡單嘅歌詞；《致陪伴我的》係冇特定人物，我而家留空咗，反而係指全部曾經陪伴我嘅人。」他又指錄音時，監製蘇道哲突然叫停，「佢突然問我諗緊邊個？我話諗緊一個唔識小朋友，佢叫小潘，我希望佢喺我側邊，我唱畀佢聽，可以舒服咁唱，好似有個人好信任我，挨得好近，好似一個安住嘅感覺。」
在MV中，釗峰寫了很多謝詞致不同的人，黎莉表示當時也想，自己應該要多謝哪個人，釗峰聞言即說：「我就係想要呢個效果，係我想你分享你嘅《致陪伴我的》，如果冇，就請你好好活在當下；我有個親戚近排容貌恐懼，覺得自己好肥，佢避開晒所有屋企人唔見，唉，我搲晒頭，咁樣唔好㗎！」
對於拍攝MV當日遇上狂風暴雨，為免影響妝容，釗峰只好獨自留在車廂中，不過他看到同事和工作人員在外面整理器材，而弄得全身盡濕，顯得十分內疚又無奈，釗峰表示：「好慘，見住大家顯晒，我就喺架車度，咩事呀？我好想幫手；我覺得大家好風雨同路，佢哋守住啲機器，同時佢哋面露笑容先勁，呢次係好深刻嘅陪伴。」
釗峰接受《新城八大家》訪問，提及他因為經常有人陪伴，從而得到心靈上的滿足，說到底，家人永遠都是最重要的人，問他工作這麼忙，可有時間陪伴家人？釗峰說：「我唔係好多時間擺喺屋企，但我同屋企人相處方式就係未必需要咁多時間，我哋搵到一種默契，會互相分享，已經唔需要太過牽掛，我幾好佢哋就ok，當然我同佢哋都有去飲茶。」
