畢業於演藝學院的劉俊謙，憑電影《幻愛》、Netflix台劇《此時此刻》而為人所熟悉，早前更以電影《九龍城寨之圍城》的「信一」更爆紅。向來甚少提及父母的劉俊謙，原來爸爸劉穎是一位牧師。
劉穎牧師早年舉行「Hearing b4 Healing We Are With You演唱會」，當中有份獻唱《海闊天空》、《交叉點》、《Shall We Talk》，以及詩歌等等。及後他提到兒子，劉穎牧師風趣地說：「我姓劉，我個仔叫阿謙，咁咪叫劉謙，唔係，佢個名係三個字，叫劉俊謙，係我同太太改，真係人如其名。」
唱完《Shall We Talk》後，劉穎牧師表示勾起他的一段往事，並分享了一個劉俊謙的故事，「我做咗牧師好多年、做咗爸爸好多年，記得我個仔阿謙中學會考嗰年，發生咗一件事。佢係學校入面嘅籃球隊隊員，突然間，佢想去打沙灘排球，我話點解轉打沙灘排球？原來佢見到異象，原來佢隔籬班有個女同學係沙灘排球隊員，個女仔聲又甜、樣又靚，係佢杯茶。」劉穎牧師認為中五學生拍拖是一件正常事，而兒子又想一嘗拍拖的感覺，不過因為正值會考，劉穎牧師始終不想兒子拍拖，「我同太太花好多時間聽佢講，點解佢想拍拖呢，咩原因呢，哦，原來佢想有啲拍拖嘅感覺，咁我同太太就分享喺中學、大學拍拖嘅經歷，原來拍拖係高難度，拍拖係好花時間同花心機，我哋冇即時拒絕佢，我覺得需要尊重佢，我就同阿仔講講『不如你用一個月時間諗下先』，係咪咁急今年會考就拍拖呢？第二，雖然呢個女仔係你杯茶，不過佢未信耶穌，喺信仰上都唔係好夾，知唔知將來一齊都會有溝通問題，一個月之後，佢同我講『阿爸，我諗都係要擱置想拍拖嘅感覺』，因為佢自己都覺得Handle唔到，我好開心佢係好認真做呢個決定。」
