周吉佩（吉吉）昨日（16日）在新城廣播，接受由譚玉瑛、何基佑和麥皓兒主持的《QK玉瑛室》訪問，談及今年工作的安排，吉吉透露12月初舉行首個個人演唱會，「我細個諗太多，諗到好長遠，一入行嘅時候就諗，5年後要去邊度開演唱會，幾多年後我要做啲乜，但係點知第2年都過唔到，所以諗咁多做咩呢，今時今日嘅自己，要活在當下，做好個騷已經足夠。」
雖然吉吉表示暫時未可公布場地，但預計可容納不少人數的地方。譚玉瑛問吉吉屆時會否騷6舊腹肌或者跳舞？吉吉笑說：「我首《Falling For You》都有跳舞，所以我一定會跳，只係多與少，我都希望多啲跳舞；而6舊腹肌就努力當中，我都想嘅，因為我有個畫面，有機會我想孭住支結他，除咗件衫，懶係型咁樣呢！」譚玉瑛聽完後即表示：「你講完我都好期待喺你嘅演唱會度睇到。」何基佑笑說：「除衫係不歸路，下次冇得唔除。」吉吉突然醒覺：「係喎！盡量去做，練到就好啦，練唔到就露手臂畀大家睇。」
節目後，吉吉接受《新城八大家》訪問，對於12月舉行首個個人演唱會，吉吉表示會邀請幾位對他很重要的人擔任表演嘉賓。提到他有意在演唱會上，赤裸上半身騷肌彈結他，吉吉聞後立即笑說：「目標係咁樣，（好有謝霆鋒嘅畫面？）我都想呀，我以佢為目標，但真係唔容易，因為近排我喺馬來西亞狂食，返到香港要即刻操，所以係咁做健身，（暫時成果係點？）上身係大隻咗少少，厚肉咗，但要時間囉，3、4個月，都好急，因為我有好多想法想擺入演唱會入面，因為我有好多諗法，最近同公司傾緊，我有好多嘢想表達，始終我喺呢10幾年入面，有好多經歷、樂隊嘅歌，好想濃縮晒。（有冇一Part係家庭？）有家庭嘅元素，不過佢哋唔會上台。」
