新城廣播DJ T.Max(海淦清)早前以歌手身份,推出首支單曲《大細路》,日前接受由譚玉瑛、何基佑和黃筠兒主持的《QK玉瑛室》訪問,T.Max稱在成長期間,自己是一個暴風少年,最後因為媽媽的一個舉動,令他重回正軌。
![娛樂-DJ-tmax-大細路](https://metro.hk/wp-content/uploads/2024/07/WhatsApp-Image-2024-07-10-at-16.05.04.jpeg)
T.Max表示讀至中四就輟學,當時是一個暴風少年的他,一直要由社工跟進輔導,「我阿爸阿媽搞我唔掂,有次返到屋企,我見到掛晒十字架,佢哋話希望主可以幫到我。」譚玉瑛問他當時的反叛程度,T.Max續說:「離家出走係基本,書又唔讀,夜晚又群埋邨童,以為自己係『陳浩南』,後來幾乎要坐監,好大件事,我嘅轉捩點係,嗰次警察上嚟我屋企,嗰陣我同屋企嘈得幾勁,將櫃桶拆出嚟,拎住櫃桶嘅路軌同阿爸阿媽對峙,因為好嘈,隔籬屋以為家暴,於是報警,第一次見到有防暴警察拎住盾牌嚟,我心諗『慘喇,呢次輸咗!』,我記得警察叫咗阿爸阿媽出去傾偈,之後沙展哥哥捉住我傾,話『你知唔知你阿爸阿媽對你幾好呀?其實你拉得,不過佢哋愛你,錫你,你諗下之後點啦,夜晚,仲畀我見到你喺條街度,即刻錔你返去。』,跟住我阿媽入嚟,話想捉住我隻手祈禱,然後聽到佢哽咽,咁我真係問自己,我係咪呢一世都係咁,今次唔使被人拉,唔使坐監,係好彩,咁下次呢?所以我覺得要做啲嘢去改變我嘅人生,但係我冇讀晒書,可以做咩呢?嗰段時間好迷失。」
![娛樂-DJ-tmax-大細路](https://metro.hk/wp-content/uploads/2024/07/WhatsApp-Image-2024-07-10-at-16.04.58.jpeg)
後來,他接觸舞台劇,更有份參演詹瑞文的《快樂勿語》,席間,更遇到兩位恩師Cleo(高晨維)和Nic(劉凱揚),縱使當時的T.Max臭脾氣,很難教,但Cleo和Nic都沒有放棄他,反而悉心教導他做人的道理,帶他走回正軌。
![娛樂-DJ-tmax-大細路](https://metro.hk/wp-content/uploads/2024/07/359504286_17993297246082619_5542333488441971928_n-1.jpg)
T.Max透露稍後再推出第二首單曲,是以熱飲品為主題,「帶出都市人嘅生活,我都幾受90年代Hip hop文化影響,例如農夫、LMF,佢哋嘅文字都比較貼地,我鍾意用呢種手法帶出自己想講嘅嘢,我好鍾意思考嘅人。」