港仲處於的士同Uber之爭；內地今日論壇已經變成自動駕駛與網約車司機之爭。事緣有報道指百度喺北京獲批無人駕駛營業服務，而今日喺社交平台廣傳嘅一張圖，已經喺內地多個社交平台出現，主要係啲人話4.99人民幣，可搭7公里，搭自動駕駛車，好過自己揸車。
不過，網上既主要爭論點，並非自動駕駛既車有無營業牌照，而係如果大量網約車被自動駕駛汽車取代，會唔會造成更多低下階層下崗，以及失去人民失業既避風港。宜家內地面對經濟下行嘅壓力，百度推出新業務，令到網約車司機被搶生意，究竟內地是否默許。
港股咁難得有真-自動駕駛股百度（9888），大家既重點，自然唔會係討論下崗問題。香港連網約車隊都未行到，啲咁深層次既問題，我地好難身同感受，真係千里遠。而內地A股市場投資者呢？有人話百度唔係滬港通，買唔到，佢地就諗新市場受惠者同受害者。
好似今朝就有大众交通漲停，因為市場估日後不止百度一家無人駕駛集團。利空呢？低價車（油及電車）生產商，因為日後車既需求可能會少左。即係好似如果他日香港全用電車，Toyota 就會少左單。所以滬港通有得沽既小米（1810），咪就咁樣樣。
講返大家關心既問題，買唔買百度？今朝資金投票，唔使我多講。百度本身估值唔算高，嚟緊三中全會，會唔會講科技應用支撐經濟？呢啲憧憬，短期應該幫到氣氛。至於日後內地是否接受自動駕駛向全國推廣，問題就比較複雜，咁長遠既野，市場呢刻放埋一邊先。如果您走短，就純自己睇位炒氣氛。
港股呢？科技股好返啲，中特估，特別係資源股，即重挫。所以呢？買港股，個市場無新錢，想長啲都搞唔掂，次次都逼人鬥快食糊。
有個留言，我笑咗，希望俾仲有港股既朋友笑下。有人話，自動駕駛可有效減少碰瓷問題，因為碰瓷嘅人，都唔知向邊個攞錢。而且，佢地會擔心自動駕駛剎唔切車，碰瓷，變真撞車。呢樣野同港股一樣，非常local，當地人自然會明。
【關於 #何啟聰】
自小熱愛投資市場，大學時期獲得多個投資比賽獎項。因緣際會下加入投資銀行從事衍生工具銷售工作及投資者教育工作十九年，曾任職荷蘭銀行、蘇格蘭皇家銀行及瑞信香港董事。由興趣演變成事業，離開崗位後有更多空間分享理財投資看法，歡迎交流。
