近年愈來愈多學生計劃到海外升學，本地亦有不少國際課程，方便學生銜接海外大學，未來出路比從前更多選擇。離開熟悉的「Comfort Zone」絕非易事，考慮的除了是經濟條件，更需要衡量的是心理質素。香港直接資助學校議會主席兼英華書院校長陳狄安曾到海外留學，外地生活豐富了他的人生經歷，更讓他具備多種生活技能，回港後學以致用，畢生受用。
海外留學期間不停打工 : 主要想切身感受當地生活
陳狄安曾於英國留學，他直言外國讀書非常看重個人責任 「外國大學畀好多時間學生做資料搜集、Project及研究，亦有好多閱讀嘅時間，正式上堂時間冇香港咁多，相對重視學生對學習嘅責任。」不過海外留學的經歷帶給陳狄安最大的收穫非學術知識，而是一些生活技能與態度「西方國家生活冇亞洲地區咁多姿多彩，比較空閒，我鍾意接觸新事物，所以除咗讀書，嗰時都做好多Part Time，主要想切身感受當地生活。」陳狄安在海外留學期間，做過各式各樣的工種，做過廚房亦學過「整麵包」，不同的工作經驗也令他有所得益。
「雖然學做麵包對而家份工冇直接幫助，但從中學到「如何學習」、「如何進步」。大家文化唔同，當時經常要面對不同顧客及老闆，更加令我學識工作最重要嘅係包容與體諒。」
人在異地最想念香港的食物
跳出「Comfort Zone」需要勇氣，人在異地難免會感到孤獨，不過陳狄安卻沒有受思鄉所困，唯一惦記的是香港的食物。「有時會掛住香港啲雲吞麵、皮蛋瘦肉粥…不過而家呢啲食物嗰度都有」他補充 :「去外國讀書前最緊要做多啲資料搜集，對即將前往嘅國家、居住環境、修讀嘅學科有一定了解，咁做可以令自己冇咁焦慮。」「舊時我仲係用緊電話線通訊，收費非常貴，但而家透過各種社交通訊軟件，已經好輕易可以聯絡到香港嘅家人同朋友，只要善用網絡工具，就唔怕同親友變得疏離。」
自小參加童軍學會傳承 中學時已下定決心做教師
眾所周知海外有林林總總的學科修讀，但從事教育界的陳狄安當時修讀的卻是會計學和財務分析學「我中六中七時已決心做教育，不過當時班主任提醒我教育行頭比較窄，建議我先修讀自己相對有興趣嘅其他學科，所以就揀咗會計。不過返嚟香港之後，都係做返同教育相關嘅嘢，由教學助理開始做起。」至於為何對教育情有獨鍾，就要追溯到他小時候的體驗與經歷：「我由細到大都做童軍，學懂如何傳承及教導別人，學識如何大教細，覺得教育帶畀我好多成功同滿足感。直到遇上中六中七時候嘅班主任，我更加下定決心從事教育，我當時讀書唔叻，但喺佢身上我獲得好多人生啟導，學識點樣用生命影響生命，用咩方法教年輕人。」
給學生們的4大提醒 : 如果冇正面樂觀嘅心，好難生活
放榜在即，對於正考慮前往海外升學的年輕人，陳狄安有一大提醒「去到盡量要參加多啲唔同活動，…唔單止可以令你認識當地文化，最重要係可以識到新朋友，能夠拓展人際網絡之餘，更能留下寶貴回憶。」他認為到外國讀書卻「摺埋自己」等於浪費金錢。除此之外，他亦提醒年青人要時刻保持良好的心理質素「有啲國家好快天黑，經常天陰陰，如果冇一份正面樂觀嘅心，好難生活。」
至於家長方面，他除了要考慮財務狀況外，更可考慮子女能否在香港修讀心儀的科目「即使香港有得讀，都要諗有冇能力考上，因為香港大學學位供不應求。如果自問有能力考上，留喺香港讀書都係好事。」同時他亦強調海外讀書最大的得益是擴闊視野「讀萬卷書不如行萬里路，兩者都重要，但更加要行萬里路。無論去邊一個地方讀書，面對截然不同嘅生活，一定會有所成長，重新適應一個新環境已經係一種學習。正正因為我以前試過好多不同類型嘅嘢，所以抗逆力同韌力比較高。」
圖片 : 陳狄安提供
撰文 : 謝明蕙
責任編輯 : 陳小芝
