畢業於香港演藝學院的李炘頤（Alina），主修現代舞，之後做了3、4年全職舞蹈員，機緣巧合下，她先後報名參加選美及選秀節目而入行。日前，Alina在新城廣播，接受由譚玉瑛、何基佑及麥皓兒主持的《QK玉瑛室》訪問，她表示很想做第二個楊紫瓊。
入行8年，演藝事業發展並未如自己心中所想，Alina現時反而想回一個舞者，「唔係呢個圈複雜，可能係我諗太多，或者喺呢個圈，好多時候係太過依賴別人點去睇你而去做自己，有段時間開始有啲攰，於是我去做下義工，開始再諗番轉頭自己點解會攰，原來係因為自己已經唔記得咗想要啲乜，而踏入呢個娛樂圈，我鍾意表演係因為，跳舞都可以感染到人哋，我就係要呢個滿足感。」譚玉瑛亦認同Alina跳舞的確好吸引。
不過，Alina開始發現自己有遺憾，「我一直都好想做打女，因為我覺得身體質素好適合，可以做到呢件事，仲要有跳舞底，又學過詠春、打拳、電影嘅動作，不停去學，但係無用武之地，所以有少少洩氣，當我睇到《九龍城寨之圍城》嘅時候，如果自己有份就好，呢個係我入行好想做到嘅一件事，做『第二個楊紫瓊』。」譚玉瑛鼓勵她要保持初心，不要洩氣。
直播後，她接受《新城八大家》訪問，對於她在節目中談及有意做回一個舞者，Alina說：「我又唔係想做返幕後，只係我想擺多啲時間，將現代舞帶畀香港觀眾，等大家都知道有唔同藝術嘅存在。」提到她想做「第二個楊紫瓊」，Alina指自己的網絡不夠強，「我唔識人呀，之前一直努力過嘅嘢，其實都白費，因為都冇人見到，所以個人有少少開始怠慢，唔知點樣將自己Sell出去。」
圖片：新城
