公開考試是一場實力的比併，每年放榜有人歡喜有人愁。對於今屆香港中學文憑試（DSE）的考生來說，相信迎接放榜就如面臨一場「前途生死戰」。究竟DSE的意義何在？所謂「一試定生死」，定奪的是「成績」還是「心態」？香港中文大學校友會聯會陳震夏中學何淑妍校長，曾失利公開試，在追逐理想的過程中亦曾飽受荊棘，但卻正因為這些經歷，讓她成功走上校長之路。何校長直言公開試給予她一大啟示 — 「想成功，態度先係最緊要，成績並唔代表一切。」
成為一校之長前 曾經歷「公開試之痛」
何校長與大部分香港人一樣，都經歷過公開試的洗禮，雖然她現為一校之長，但原來她亦曾面對過「考試失手」的悲痛：「記得當時好盡力準備公開試，同同學一齊溫書，一心諗住可以喺原校升中六。」雖然心懷壯志，認真對待考試，可惜結果卻未盡人意：「當年會考有一科未達標，我入唔返原校，仲記得放榜嗰日係一個下雨天，我喊住搭的士去搵另一間學校升讀。」何校長直言這不是她預期的結果，並感到非常失望，幸好最後她能順利獲得另一間中學的取錄，並在親友鼓勵下逐漸接受眼前的一切。
縱使結果未如理想，但正因為這一役，讓何校長脫胎換骨 :「呢次考試令我有好多體會，發現自己可以更盡力，反思自己不足，知道自己弱項，對我往後高考好有幫助。」後來何校長成功考上大學，主修的更是最擅長的數學系。
錯過人生規劃最佳時機：畢業嗰年先發現原來做老師要讀教育文憑
沉醉於數學世界的何校長，形容自己在大學時期一直沒有做好人生規劃，她形容：「我當時同好多同學一樣，目標只係考好手上嘅科目，唔會諗到好遠，嗰時連中六中七讀咩都冇諗。」「讀大學時，好直接覺得畢咗業先諗，但其實咁樣太遲，畢業嗰年先發現原來做老師要讀教育文憑，身邊啲同學都報晒名，我發覺時已經過咗Deadline。」「而家覺得訂立長中短期目標好重要，因為望遠啲先可以更加聚焦現在，諗定大學想讀咩科，就可以制定現時嘅讀書策略。」
雖則比同屆畢業的大學生晚了一步修讀教育文憑，但她卻沒有因此而比他們「遲起步」。大學畢業後，她在一所技能訓練中心教學，經歷過每晚以淚洗面的日子，獲得的卻是影響一生的教學經歷，那段最難過的日子讓她更認清自己，並立下成為一位好老師的決心，直到現在，她已成為一位受學生尊敬的一校之長。「由公開試到而家，過咗一段好長嘅時間，令我更加發覺，成績唔等於一切。係咪考得好就等於未來會好順暢？呢刻成績唔理想，係咪無法成為一個成功嘅人？其實成功嘅定義有好多種。為學校、社會、任何人作出嘅貢獻，都唔會反映於成績，反而日後嘅人生處事、待人接物及態度先係最重要。最緊要係要認清自己。」
用數學理論鼓勵自己：肯試有一半機會成功，唔試就一定係零
的而且確，公開試會影響考生當刻的選擇，但「定奪生死」的從來不是「成績」，而是「心態」，能否擁有成功的人生，關鍵其實在於一個人在最艱難的時候能否抱緊信念。何校長熱愛附加數，她的人生座右銘也離不開數學百分比，「父母曾經同我講，『肯去試，有一半機會成功，但唔去試，成功機會一定係零。』就係呢句說話提醒咗我。」
事過境遷，回望當初，何校長認為公開試只是一張「階段性的成績表」，至於往後能否達至成功，則取決於做人處世的態度：「一個人能唔能夠成功 ，99% 都係睇佢肯唔肯努力，其餘1%就係環境因素及個人天賦，所以最重要就係信自己。」
圖片來源 : 何校長提供
撰文 : 謝明蕙
責任編輯：陳小芝
