姜大衛（John哥）日前在新城廣播，接受由譚玉瑛、何基佑及麥皓兒主持的節目《QK玉瑛室》訪問，入行73年的John哥，童星出身，至今仍然保持初心，他坦言很喜歡這個職業，就算有多辛苦都不會有半句怨言。
「我一生人過得都幾燦爛、幾滿足，4歲由童星做到而家，完全冇埋怨過，唔知點解，一定係好鍾意呢行，唔覺得攰。」回想小時候拍戲，John哥表示十分開心，因為既可以賺錢又不用上學，他笑道：「我10幾歲就做主角，500蚊拍一部戲，後來做武師就鍾意拍打戲，邵氏搵親我哋都係拍武打片，當年後生唔知咩叫辛苦，日頭打完，夜晚收工就出去打保齡、打枱波。」
一直以來，John哥和太太李琳琳都是圈中的模範夫婦，今年是他們結婚50周年「金婚紀念日」，John哥自爆當年如何認識李琳琳，「當年石天結婚，佢做伴娘，我同朋友去飲，其實同佢都識，但唔係好熟，之後梗係我追佢啦！」譚玉瑛追問John哥：「當時喺觀眾眼中，佢（李琳琳）好似飛女，成日着迷你裙又化粧，係時代尖端女性，就算你成日拍武打片，但你又好文靜。」John哥笑說：「我都唔知鍾意佢啲咩，係緣份。」
何基佑問John哥當時與李琳琳拍拖有什麼考量？John哥形容兩人是敢作敢為，「真正嘅明星係唔可以公開戀情，驚粉絲唔鍾意，同埋影響票房，但我個人好反叛，覺得結婚好正常啫，我仲係奉女成婚，冇大排筳席，我哋係天主教徒，只係去教堂結婚，夜晚飲完第二日就飛咗去度蜜月。」John哥續說：「我係飛仔，佢係飛女，都係反叛，但結婚係我哋私事，唔需要交代，只要我向佢交代，佢向我交代，好聽啲係前衛，我哋係為咗目的不擇手段。」
