許靖韻（Angela）今日在新城廣播接受麥卓華主持的《原來生活好快樂》訪問，並宣傳新歌《被吃掉的靈魂》。歌曲講述一個人處於絕望想放棄的階段，她指自己曾經經歷這樣的狀態。
「幾年前，好多嘢都唔順利，包括工作、感情，同家人嘅關係好差，冇乜朋友咁滯，因為我唔想見人，一個人喺屋企，完全係迷失，冇咗自己。（點樣釋放負能量？）已經負面到冇得再負面，個腦係空白，唔知自己要做乜，唔知點樣生活落去。（有冇胡思亂想？）有，但我唔敢，始終我仲有隻狗、屋企人；不過有一日，我突然之間醒覺咗。」
Angela指當時根本不想外出，但有朋友力勸她出去一起跑步，「朋友同我講『你今晚一定要出嚟，我哋已經跑到你屋企樓下。』我已經冇乜錢剩，而跑步唔使用錢，好啦，跑步，嗰下我覺得人生都仲有意義，係我啲朋友救番醒我，佢哋好堅持拉我出深淵。」現在回想起，覺得自己有點傻，但都是成長的一個經歷。
對於拍攝新歌MV當日，天下著毛毛細雨，Angela笑說：「嗰日潮漲得好勁，連救生員個台都浸咗，同事啲鞋被海水浸到唔要得，好彩第一場拍咗先，因為之後落雨落得仲勁，辛苦化妝師同髮型師，因為髮型已經冇咗，頭髮都濕晒，本身我個造型係好靚。」
此外，Angela最近先後到佛山、廣州、肇慶進行巡迴演唱會，希望將來可以再去不同地方，她笑言最想在香港舉行。
