袁偉豪和張寶兒於2020年結婚，去年11月誕下兒子「袁咕碌」袁晞祐，當時陪伴太太入產房的袁偉豪，他稱看到袁咕碌出世的一刻，不禁流下百感交集的眼淚。今年，他首度過第一個父親節，袁偉豪向《新城八大家》透露，心情是十分期待，袁咕碌不經不覺已經半歲大，在這段日子，每日看着他的成長而感到非常開心。
問到如何慶祝首個父親節？袁偉豪說：「我都會同埋外父、屋企人一齊食晏，帶埋BB出去慶祝吓。」他指接袁咕碌回家的一刻，情景仍歷歷在目，「我記得接BB返屋企，真係好開心，因為我當時喺深圳拍緊劇，太太就安排咗自己同BB喺深圳嘅月子中心，我每日收工就直接去月子中心，感覺就好似返屋企咁；後來劇組搬番香港繼續拍攝餘下戲份嘅時候，我就同太太、BB一齊搬番香港，真係好開心，為咗BB準備咗好多用品，BB有自己一間房，Set咗張床仔畀佢，亦都有一位陪月姐姐幫手照顧，我就向陪月姐姐偷師，睇吓點樣做先唔會整親BB，解讀BB啲行為，睇吓佢有咩需要。」
袁咕碌最愛笑，逗得父母非常開心，是家中的開心果，看到他，煩惱全消，袁偉豪續說：「BB每日都成長緊，尤其是有幾日離開香港去工幹，返到嚟見到佢又覺得佢長大咗，佢好鍾意笑，係一個好開心嘅小寶寶，真係非常之感恩， 將來嘅人生就要靠佢自己喇！不過我都希望喺佢成長階段入面，陪伴佢多啲，畀佢一個好好發展、成長空間，希望佢日後可以做到佢自己鍾意做嘅事，同埋回饋社會，因為佢係一個好有福嘅BB，因為袁咕碌嚟呢個世界嘅時候，得到好多人嘅祝福同愛戴，所以藉住呢個機會，希望佢將來會明白好多人都好鍾意佢，希望佢將來成材，多啲照顧身邊嘅人，回饋畀社會。」
對於袁偉豪的爸爸在2018年病逝，他表示仍然十分掛念對方，「喺爸爸離開嘅時候，聽到佢嘅同事講咗好多爸爸後生嘅故事，令我好有感覺，爸爸係一個好好嘅人，好鍾意幫人，喺工作方面亦都好專業，爸爸寫字好靚，因為爸爸做警察，每次要做筆錄，落口供嘅時候，都係佢親手去寫，因為佢啲字好靚，所以啲長官都好鍾意睇佢嘅report，到爸爸退休，佢都冇停落嚟，繼續工作，但係我哋都會時不時相聚，送好多禮物畀我哋，我係保存到而家，因為好有紀念性，我會好好記住爸爸對我勉勵同嚴厲嘅說話，對於我嚟講，爸爸係一個好專業嘅警察，我以佢為榮，希望遠方嘅爸爸繼續守護我哋，我都會向爸爸學習，照顧好媽媽、太太、BB；最後，我祝新城所有觀眾同朋友身體健康，天下嘅爸爸父親節快樂！」
圖片：IG@benontheroad
