郭富城將於8月假紅館舉行10場《郭富城ICONIC世界巡迴演唱會2024香港站》，由於門票銷情熱烈，城城今日在記者會上，宣布加開3場。在會上，城城一身皮革外套現身登場，今年是城城踏足紅館第30年，除了錄製演唱會主題曲《EXIT》外，今次更不惜工本，以近半億元打造一個立體多元舞台，還有非一般視覺特效。
相隔8年，再度重踏紅館，城城受訪時說：「今年係好唔一樣，因為我有咗自己嘅家庭，有太太、小朋友，成個新嘅rundown編排咗出嚟，我睇番所有歌詞嘅時候，感受係特別之深。」城城還表示會因應歌迷要求，獻唱以往甚少公開唱的歌曲。
城城透露會有好多快歌，始終跳舞是他的根，由於需要大量體力應付今次演唱會，早前他特意去做身體檢查，「醫生話我Very Good，我就好放心，令自己再推進，我嘅體能可以去到幾盡。」
問到會否安排兩個女兒上台？城城隨即說：「係唔會，因為大家都知道我表演嘅風格係有好完整嘅故事，係表現我成個演唱會，每個章節都好重要，所以唔可以突然之間帶兩個小朋友上台，唔係我表演嘅風格，佢哋可以喺台下睇爸爸跳。
城城今次開騷正值暑假檔期，因為要排練的關係，屆時就會很難抽到時間陪兩個寶貝女，他笑說：「已經講掂數，『爹哋會好忙，陪你哋嘅時間應該好少，可能一個禮拜先見到你哋一次。』，佢哋好生性，我訓練有數，佢哋會明，佢哋知道我做嘅工作要花好多時間；作為一個父親，會無時無刻都會掛念，我做嘅嘢，佢哋將來都會睇到爸爸嘅努力、工作嘅態度，我都佢哋學習到呢啲。
圖片：新城
