J2台主持人文頌男（Koba）去年10月，發現患上罕見癌症「尤文氏肉瘤」，隨即他要全面停工接受治療，抗癌路既艱辛又漫長，先後接受化療及電療，早前他透露電療後，暫時未有出現劇痛情況，不過，Koba仍然為醫療及生活費用而煩惱。
近日，Koba在社交平台發帖文，指自己完成電療後已經第二個星期，痛的程度，由9分降至1分，「係間歇性地會有一啲神經性嘅痺痛仍然會出現喺下肢地方。而腳底周邊位置，譬如尾趾附近開始有返啲感覺，可以郁到少少，大髀內側及後方痺感都減少咗，有返啲正常感覺，所以止痛類嘅藥物，好似神經痛嘅藥丸同嗎啡都可以降低返啲劑量咁服用。」
而且Koba亦開始接受中醫療法調理身體，但他現時的精神依然差，經常要睡覺休息，胃口亦大不如前，「食多少少都好滯嘅感覺，有時食完仲會即刻嘔晒出嚟。咁費力地強逼自己食嘢，結果又嘔返晒出嚟真係覺得好似白費晒心機同力氣。可能因為食少咗嘢，體重都輕咗大概5️kg。最近兩日更加好似感冒，雖然探熱顯示冇發燒，但我周身肌肉疼痛，瞓覺都瞓到囉囉攣，又會時常標冷汗，感覺好唔舒服。鑑於自己精神真係好差，所以呢兩個星期，都冇乜精神去回覆大家嘅訊息同留言，喺度都同大家講聲唔好意思。」
雖然面對眼前的痛苦挑戰，但Koba留言表示很高興見到電療後有明顯的改善，這是一個很好的消息，他又指：「即使而家仲面對緊好多困難，但我會繼續堅持，期望身體會逐步好番，亦希望唔會突然惡化番。我會保持樂觀，繼續努力去克服嘅困難。
之後他與網民玩Q & A，有人留言「幫唔到你啲咩，只可以同你講加油」，Koba回覆對方如想幫手，可將其眾籌貼文分享到限時動態，望有人可以捐款，他稱：「畢竟我每日最煩惱嘅就係啲生活同醫療開支。」
圖片：IG@koba_mcn
