由中國銀行（香港）（「中銀香港」）全力贊助、新城財經台主辦的年度盛事《財富管理博覽2024》，今日（6月8日）在中環四季酒店舉行。獲邀出席的陳豪，成為中銀香港高端理財服務品牌「私人財富」的新任品牌大使，並參與高峰論壇之「我和我的星二代」環節，分享對財富傳承的看法。
陳豪接受《新城八大家》訪問，他指自己在理財方面都是保守的心態，「以前會放喺藍籌嗰方面，我淨係儲，我明白到理財要有唔同嘅理財工具，主要係搵一個好嘅經紀，而且要學習增加收入，地產都係其中一個辦法，但係喺香港嚟講係一個比較重嘅投資，而且而家嘅磚頭越嚟越貴，喺一個咁貴嘅入場費之下，係咪有足夠嘅金錢去買呢？之後仲要維修，好多數都要計，計得掂就去買。」
問到他是屬於甚麼類型的投資者？陳豪表示：「防守反擊，我永遠都抱住一個防守嘅狀態，唔好畀太多嘢去衝擊到自己，見到機會嘅話，喺嗰一刻就會放膽少少，投放多啲落去。」陳豪指最重要是用多餘的資金，千萬不要用收入去投資，始終投資是一個賭博。
育有三名子女的陳豪，笑言他們才是最重的投資，「小朋友開始大，使費只會越來越高，作為父母，要為佢哋做一個長遠嘅規劃。（係咪有外國升學嘅計劃？）實有，所以我有為佢哋買保險產品、理財產品、教育基金，海外升學基金，呢啲係我哋要計劃嘅嘢。」
陳豪是連鎖咖啡店品牌創辦人，竟然選擇在逆巿開設六間分店，他說：「雖然整體大環境唔係太過理想，但相反有好多機會就係喺呢個時候洐生出嚟，我哋以前睇某一啲嘅舖位，舖租可能好高，突然間啲舖吉咗出嚟，租金OK喎，我先有信心嘗試，同埋有好多生意，好早已經傾落咗，我都係嗰句，只要租金唔係太離譜，就要睇吓嗰個地方嘅收入能唔能夠收到個平衡，所以最主要係睇收支平衡。」他稱將會繼續開分店，認為生意的步伐是不能停下來。
