Maria Cordero昨日現身新城，接受由譚玉瑛、何基佑及麥皓兒主持的《QK玉瑛室》訪問，眾所周知，她一向喜歡幫忙別人，對每件事都好上心，因為這個性格，大家都稱呼她做肥媽。
「1985年，我當時喺廣東道嘅Canton Disco（當年梅艷芳、張國榮、陳百強等都是座上客）唱歌，你講得出嘅明星都喺晒嗰度，有啲人飲得太多酒、食得太多熱氣嘢，啲人問我點，『Maria，點呀，我爆瘡，又有口氣。』我咪叫佢飲夏枯草，一係飲糖冬瓜，有時我又會煲啲湯擺喺琴後面，叫佢哋飲，叫酒吧唔好賣酒畀佢飲，呢啲係阿媽嘅習慣，係羅君左叫我做『肥媽』先，跟住個個都咁叫。」
喜歡照顧別人的肥媽，家有7兄弟姊妹，7歲時開始當家，凡有問題都要自己想辧法解決。譚玉瑛問到如總有解決不到的時候，肥媽說：「解決唔到咪逆來順受，我喺無綫炒緊餸，一日之內，有隻股票由8蚊跌到8仙，我唔見咗5000萬，助手問我點，我話都要繼續拍埋個節目㗎，我擁有嗰陣時係3蚊，升到8蚊，或者個天覺得，畀個身體健康你，唔好要呢啲錢，我好信個天，佢閂咗你一道門，佢一定開番一扇窗畀你。」
何基佑問到肥媽當年賺到第一份糧，買甚麼禮物獎勵自己？肥媽說：「買錶，保存到而家，放咗入保險箱，不時拎番出嚟睇，都好Proud Of自己，啲人話有食冇食，都要買隻滴滴。」提到有段時間，肥媽在被騙的情況下，做了一位家人的擔保，「我唔知佢借錢，佢走咗移民，我就要還，當時我攞住幾件衫，走咗6個月，冇返過香港，我周圍登台唱歌，如果冇現錢，我就唔出台，我乜人都未驚過，命都可以唔要，就咁唱咗6個月，我返香港，拎住一個網球大袋，裝住50萬人民幣。當時其實我好嬲，好憤怒，我咁勤力，又冇害人，我走去睇相，究竟我衰到幾時，睇相佬話我都唔認命。」
事後，肥媽接受《新城八大家》訪問，「儍啦，你有能力照顧人，做個付出嘅人，好過淨係收穫，我幫完人，係咪個個感激我？冇，起碼有90%唔感激你，但係唔緊要，你諗住人哋感激你就冇咗個意義，我就係大家姐、阿媽嘅性格，其實我能夠有今日，都係呢班仔女、呢班人要我幫，先能夠推動到我做咁多嘢，如果我冇咁多細路哥，又唔使照顧細佬妹，或者我嘅人生真係冇乜作用，我嘅人生幾精彩，到而家我嘅細佬妹、佢哋啲孫，乜嘢都會問我，我好enjoy呢樣嘢，有個好嘅心態，人都冇咁老。」
提到有網民發覺肥媽比以前清減，她笑言做了瘦面和剝了兩隻大牙，雖然如此，但她的食量沒有減少，「前排我特登去順德食魚、燒全羊、乞兒雞；早輪我去咗雍雅山房食傳統菜，而家呢啲菜冇人整。（有冇鑽研傳統菜色？）有，我識整，因為我鍾意煮嘢、鍾意食嘢，啲人食晒，我好開心，我叫咗《中年好聲音》同《中年好聲音2》嚟食飯，幾十人，我自己煮，我整咗幾斤牛腩，炒洋蔥都炒到我手痛，10分鐘都唔使，呢班友仔食晒。（你啲廚藝跟邊個學？）我阿媽，同埋以前有人結婚，好多人幫手煮嘢，我就喺側邊睇。
圖片：新城
