電影《九龍城寨之圍城》集合80年代香港情懷、武打動作，成為本年度的話題之作，更獲選入圍第77屆康城影展「午夜展映單元」，截至昨日（22日）上午11時15分，《九》片的票房已經突破7000萬，繼續成為單日票房冠軍。在《九》片中飾演大反派「王九」的伍允龍（Philip），日前在新城接受由譚玉瑛、何基佑及麥皓兒主持的《QK玉瑛室》訪問，向來孝順的Philip更攜同由美國返港的媽媽現身。
連日來，《九》片的演員不停進行謝票，何基佑問Philip在這數個星期，忙到天昏地暗有何感受？Philip說：「我同城寨都好有緣份，我之前拍過電視劇《城寨英雄》，反應好好。今次拍電影又好好，真係好快感覺到嗰個分別，分別就係好多人搵我，感謝主，好開心！雖然要兼顧好多唔同嘅嘢，但做藝人都係想咁樣啫。」
圖片：新城
Philip透露7歲的時候，跟隨家人移民到美國生活，爸爸在當地開設武館，所以Philip自小就接觸功夫，13歲時，他真正深入研究功夫，他續說：「因為當年我畀一個外籍嘅小朋友一拳打落心口，打到瞓咗喺度，嗰時覺得自己練功夫咁多年，點解會唔打得？原來細個學功夫比較皮毛，之後我就開始深入研究中國搏擊，利用呢個技術去保護自己。」入行後，Philip成為動作演員和武術指導。
由於Philip十分喜愛看功夫片，所以由細到大，他覺得成龍很有型，視對方為偶像，「細個嘅時候我會幻想，如果有日可以喺銀幕上打功夫就好喇，不過都係諗吓，唔敢太認真；因為嗰時喺美國冇乜娛樂，屋企人會租錄影帶返屋企睇，好記得我睇到《醉拳》盒錄影帶花晒，嗰部戲影響我最深，所以成日會諗『如果有機會喺香港畀成龍打一鎚就好喇』!」現場所有人聞後即捧腹大笑！
每次拍動作場面，Philip都是使出真功夫，他大爆與林峯拍追打戲時不慎受傷，「嗰日拍我喺城寨冷巷跑嚟跑去，我跳過三級樓梯，一落地聽到『卟』一聲，原來大髀肌肉撕裂咗，最後休息咗一星期，但一返去拍追林峯的戲份，拍咗成晚又傷過。」Philip和林峯為電影同樣是拼命三郎，更因為這部電影而成為好兄弟，「我同阿峯識咗好多年，但未正式合作過，今次真係同佢變咗兄弟，拍呢類型戲同打一場仗冇分別，一齊經過一個咁辛苦嘅經驗，一cut機大家都好照顧對方，變成咗戰友。」
