李幸倪（Gin Lee）今日在新城接受由知訊台台長程凱欣和麥卓華主持的《原來生活好快樂》訪問，宣傳近日推出的新歌《告別煤氣燈》。Gin Lee指這首歌講及每個人在成長過程中都會受到不同程度的情緒勒索，她直言在朋友圈子及行內亦曾遇過這個經歷，令她傷心了一段時間。
Gin Lee憶述未入行前遭到一位閨密打擊，「佢叫我唔好發明星夢，正正經經揀個大學課程嚟讀啦，因為我讀理科，身邊嘅人都係做醫生、藥劑師，無啦啦我要去做歌手，（對方係出自真心定妒忌？）我冇去諗，寧願相信佢係為我好，我冇理咁多，自己鍾意咩自己知㗎嘛，我就揀咗讀音樂做歌手，有咩辛苦咪自己承擔，就算失敗，起碼我試過。（當時有冇唔開心？）傷心咗一個禮拜，我好在意呀，畢業後都冇再聯絡佢。」
正當她打算出道之際，Gin Lee再次遇到情緒勒索，她續說：「我用僅餘嘅資源去做demo，之後去問自己好尊敬嘅行內知名音樂人嘅意見，想知自己有冇機會可以出道，對方叫我『打消呢個念頭啦，你唔啱做歌手，廢咗全身武功再學過啦！』，我好Shock，有冇去到咁差呀，（其實衰啲咩？）佢覺得我（啲歌）冇特別，好普通，其實好崩潰，一心諗住讀音樂，表演儲經驗，就係為咗（出道）呢一日，原來我做嘅嘢係作廢，好傷心，好糾結，係咪應該唔做歌手？去到有一刻，我醒咗，我心諗，我都未做就判我死刑，唔通你咁講我就要聽？得唔得，我會證明畀自己睇，所以我咬緊牙關用盡辦法出道，做歌手，出碟，離鄉別井，一步一步咁去實現，我用夢想去塞住啲人把口係其中一個方法。」
多年來，Gin Lee在音樂路上獲得多張美麗的成績表，成為大家認同的女歌手，不過，去年她又再一次情緒被勒索，「近期有個朋友鬧我，表面上係為我好，但佢講『你唔應該咁樣做歌手，你唔應該做啲咁嘅歌。』真係堅鬧，我覺得你以咩咩身分去評價呢？如果用普通觀眾，可唔可以客觀啲？或者唔緊要，你有你嘅觀點，但唔需要challenge我嘅專業，你唔係專業行內人，畀唔到專業分析我，我有少少唔知點樣消化呢件事，我當時冇同佢拗，但傷心咗幾日，因為通常好close嘅人，都會好在意，（仲有冇搵佢？）冇嬲佢，但盡量唔好傾咁多偈，我唔知幾時再鬧我，哈哈哈！」
Gin Lee再以楊紫瓊當上奧斯卡影后的一席話『女士們，不要讓任何人告訴你，你已經過了最好的時光，不要放棄！』，她說：「我覺得呢個話題好需要去講，所以同填詞人鍾說分享咗以上自己親身經歷，楊紫瓊嘅得獎感言，睇外國節目得到一啲啟發，佢好快就話『我明喇，情緒勒索吖嘛！』佢話知點寫，因為佢都受過唔少，原來大家都經歷過，於是就寫咗《告別煤氣燈》。」
