寶珮如今日在新城廣播接受由漢陽主持的《詩歌有Guide》訪問，她透露在節目中會分享1999年遇上車禍，不幸破相，經過7年整形手術，因為停工而令經濟陷入困境的一段經歷，神如何帶領她走過每一天，從聖經中學習忍耐、信心和盼望。
「初初我都想過放棄，點解會係我？但我再諗一層，耶穌要我有呢個經歷，係要我學習我以前冇學過嘅嘢，我以前好驕傲、好唔感恩、好曳，但當我有呢個經歷嘅時候，而家嘅我就覺得人生冇乜大不了。」這段日子的確很難撐下去，她被迫要停工，幸有好友袁潔儀在金錢上的幫助，寶珮如說：「當年我要做7年嘅手術，要著壓力衣，就連瞓覺都要著，邊度都唔去得，所以停晒工，冇工開，我問人借錢，真係『求人如吞三尺劍』。（有冇一個好難堪嘅經歷？）我唔想講邊個，借錢借到佢話『長貧難顧』，我聽到呢4個字，眼淚在心裡流，我借錢借到冇咗朋友，真正朋友仲喺我身邊，淨番好少，所以我好珍惜佢哋嘅愛，好感恩佢哋一直陪住我。」
對於「大姐明」林建明當年曾為她出氣，寶珮如說：「當年我撞車入到醫院，急症室係先救有生命危險嘅人，當時我係好嚴重，面爛晒，佈滿晒血，口入面唔知係玻璃定係碎牙，大姐明幾日都有嚟睇我，但我仲喺急症室嘅分流區，咁佢就嘈，我當時冇昏迷，聽到佢嘈『喂，仲未做手術？仲要等幾耐?一年？半年？幾個多月？』，跟住即刻同我做手術，佢唔嘈嘅話，我都唔知仲要瞓幾耐，我知道我做手術嘅時候，大姐明一直等，冇離棄我，因為到我醒之後，護士同我講番『林建明對你咁好嘅，佢等你做完手術，佢先至走呀！』，聽到之後，我覺得大姐明比阿媽更加重要，佢煲湯畀我飲，幫我籌錢，因為我媽媽當時已經好大年紀，而且佢本身好軟弱，所以我唔可以畀佢知我撞車。
