李琳琳最近忙於為主演的電影《從今以後》宣傳，今日她與《從》片導演楊曜愷在新城，接受譚玉瑛、何基佑及麥皓兒主持的《QK玉瑛室》訪問，大談拍攝時候的點滴。相隔30多年復出拍戲，琳琳姐直言深深被劇本和角色吸引，「原本我都有啲猶豫不決，我最主要驚自己out咗，始終30幾年冇喺幕前演戲，又做咗『寄生蟲』好耐，不過John（老公姜大衛）話呢個角色好難得，自己都好想做，所以接受導演邀請。」
至於找來琳琳姐擔演主角之一，導演楊曜愷表示：「我想搵啲好耐冇見過嘅演員，比較特別啲嘅，唔係成日喺電視台見到做阿媽嗰啲演員，咁啱搵到一套80年代舊電視劇《輪流轉》見到琳琳姐，覺得佢好適合。」譚玉瑛聞後即指自己亦有份參演《輪流轉》，現場所有人大感驚訝，譚玉瑛續說：「我當年喺訓練班出嚟，有份喺劇入面做學生，即係你睇極都睇唔到我，但又有份捱夜拍嗰啲。」
提到琳琳姐在《從》片，與另一位女主角區嘉雯有大膽的接吻鏡頭，角色甚為突破，譚玉瑛指自己在戲院看到這一幕接吻戲時，要碌大雙眼，並說：「我要睇吓有幾親熱！」琳琳姐稱這場接吻戲，與區嘉雯是自由發揮，她說：「嘉雯嗰隻眼唔使講嘢就有晒戲喺裡面，令到我好想摸佢塊面，輕輕鍚咗佢一啖，但佢仲望住我，我覺得自己唔夠，要嘴多佢一啖，仲要勁啲嘅。」譚玉瑛大讚李琳琳：「果然係功力深厚嘅演員。」
