嚴秋華，一個熟識的名字！還記得在他年青的時候，曾在無綫兒童節目《跳飛機》，扮演過「大怪獸」嗎？出身於較為低收入家庭的他，4歲開始在片場打滾；14歲的那一年，嚴秋華加入無綫成為合約演員，雖然每個月都有固定收入，但在《跳飛機》節目中扮演「大怪獸」時，有次更委屈到忍不住大哭一場！
早前，嚴秋華接受《香港演藝人協會》訪問，憶述當年穿上怪獸戲服痛哭一場的情景，「因為我好熱，好攰，嗰班小朋友又唔聽話，唸對白又成日NG，又甩，我都好激氣，但係又冇辦法，佢哋係小朋友，我覺得好委屈，自己咪喺（戲服）入面喊囉，冇人知，我冇同Sunny哥哥（《跳飛機》主持）講，喊完就冇事啦！其實Sunny哥哥對我好好，佢教我玩魔術，我同小朋友處理得好好，其實我都好鍾意小朋友。」
做演員，不見樣，總會聽到不少閒言閒語，嚴秋華坦言總會聽過，「係有啲困擾，困擾係被自己嘅朋友唆擺，有啲人話『阿秋，點解你唔出鏡㗎？笠住個頭，邊有人識你呀？咁就叫做演戲呀？』，嗰陣時我唔識得去分析，久唔久有一啲事件刺激到自己，就覺得好似有啲委屈，當然啦，而家諗番都係一啲沙沙石石嘅事，因為嗰陣時係一個唔成熟嘅心態。」
一直以來，嚴秋華從來沒有停下來，花時間去認識自己，直至有次到訪張雷家，看到他收藏了很多哲學書，最後嚴秋華拿起一些佛學書來看，「睇佛學書，我開始認識自己，我睇到好多道理，睇到好多自己嘅不是，原來自己係一塌糊塗，覺得自己好難再做落去，因為已經再冇興趣，反而我出去接觸商業社會，令我幾興奮，因為我從來未試過8點幾起身，成條街都係人。
