陳國權在70年代，因舅父是資深動作指導唐佳的關係，他毅然晉身演藝界擔任武術指導，1976年在一部美國電影《無敵女金剛》中，為女主角擔任替身；其後獲時任無綫助理總經理林賜祥（即金牌經理人陳家瑛丈夫）賞識，安排他在由王天林執導的無綫劇集《貼錯門神》飾演第二男主角「牛咁眼」一角，從而為觀眾所認識，亦有電影公司乘勢開拍電影《新貼錯門神》。
早前，陳國權接受《香港演藝人協會》訪問，他透露首次演戲感到十分緊張，「好大疊劇本拎畀我，背劇本唔係我強項，於是日日棟起床板係咁讀，可能上天安排，我好快就融入咗去，連黃元申都覺得我係一個好特別嘅人，因為佢知道我會記埋佢嘅對白，做成場戲嘅時候，可能你漏咗一句，就要重頭嚟過，咁我講埋佢嘅對白…慢慢熟習咗做演員。」及後，陳國權參演不少劇集，包括《千王之王》、《流氓皇帝》、《楊門女將》、《戲班小子》、《鹿鼎記》、《赤腳紳士》等等。
直至1998年，陳國權決定離開無綫，到內地發展，「我當時係指導合約，又唔係簽演員合約，做演員做到好灰心，我想做番指導，咁啱有機會出去做指導，而呢個監製話唔夠演員，變咗搵我去演，呢套電視劇喺國內拍，但好衰唔衰，佢賣咗畀亞視播，我係指導合約，我係可以出去做演員，你唔可以將我軍吖嘛，跟住開始動我哋嘅武術組，當時武術組有八組，我係其中一組，佢動我哋嗰一組，即係動我哋嘅阿頭，我哋老一輩嘅人比較講義氣，咁我唔做，我咪辭職開始返國內囉！」自此，陳國權在國內工作，不時邀請香港藝人到國內的酒樓登台，閒時亦會留在香港，湊孫為樂。
