Anson Lo盧瀚霆7.7生日大日子，在正式踏入三字頭之前，神徒們的慶祝活動一浪接一浪，先有慈善寵物步行創世界紀錄，再於7月6日晚假亞博搞5千人巨型生日會，教主台上感性告白，承諾要俾神徒「被保護嘅感覺」，冧到全場尖叫！

慈善步行創紀錄 神徒攜愛犬撐Amber
為慶祝教主生日，盧瀚霆國際後援會7月5日舉辦「Anson Lo Charity Pet Walk」，吸引近4000神徒帶同狗狗參與，成功以1,008個狗掌印打破「最大規模狗狗掌印展示」世界紀錄！活動結合慈善籌款同寵物領養宣傳，場內設打卡位、遊戲攤位，連受惠機構都開檔呼籲關注弱勢社群。有神徒興奮話：「教主鍾意Amber，我哋都想同佢隻愛犬玩，順便宣揚領養代替購買！」

「教姐」Sharon同Amber驚喜現身，更主持起步鳴槍儀式，Amber瞬間成為全場焦點，神徒爭相同佢selfie，Sharon笑爆：「Amber見到Anson啲廣告都冇反應，可能認唔出哥哥！」教姐又爆料話教主曾想帶Amber跑步，但怕狗狗頂唔順先放棄，仲大讚Amber在Anson休養期間做「精神支柱」，日日黐實主人超暖心。

5千神徒變粉紅海 教主花車巡遊獻唱
慶祝活動幕幕高潮！7月6日晚亞博舉行《Together We Celebrate》生日會，5000神徒早早就排隊，場外瞬間變粉紅人海。好友娟姐（練美娟）擔任主持，Anson Lo一出場全場尖叫，教主勁寵粉，向四面台狂派心兼獻唱，仲坐住粉紅花車繞場，近距離同神徒互動！

30歲宣言：要變Man保護神徒
吹蠟燭時全場大合唱生日歌，教主感動到眼濕濕：「估唔到今年可以同5000人一齊過！人哋話29+1？我直接講30歲啦，仲越嚟越Man添！」教主坦言30歲係人生轉捩點：「以前嘅遺憾、挫敗全部擺低，而家要勇往直前！除咗事業，我嘅責任感都重咗，想照顧屋企人同每一位神徒，等你哋靠住我時有被保護嘅感覺！」冧爆宣言惹全場瘋狂尖叫。

正日生日開工 手術後感激家人陪伴
Anson Lo受訪時話，正日生日（7月7日）要去做School Tour，夜晚先同家人食飯慶祝。講到早前做手術，佢多謝屋企人輪流照顧：「住院幾日，屋企人日日煮飯陪我，助手仲瞓醫院睇住我！」至於Amber喺慈善步行玩得咁開心，教主笑稱：「我知佢脾氣，實high爆！多謝神徒頂住烈日支持，真係好Powerful！」

圖片：大會提供

The post AnsonLo盧瀚霆30歲生日Man爆冧神徒：靠住我有被保護感覺！ appeared first on .