咁佢又冇講錯，保障呢啲嘢我真係識條鐵咩？聽人講一畢業就要買保險，grad trip返嚟係咪都要買返份，等阿媽放心？

保險即係乜？

保險係一種轉移風險嘅理財工具，你向保險公司交保費，將未來可能會發生嘅財務損失交畀保險公司去承擔。試諗吓，假如你嘅父母已經或者準備退休、屋企層樓要靠你幫手供，touchwood你英年早逝，呢個突如其來嘅經濟壓力可能嚴重影響佢哋嘅日常生活。人壽保險嘅設計原意，就係應對呢種身故風險，由保險公司向你嘅受養人發放身故賠償，減輕佢哋嘅經濟負擔。

Tips：後生仔嘅身故風險比較低，一般嚟講，越早買人壽保險，就能夠用相對較低嘅保費獲得長期嘅保障。

買人壽保險有錢分？是咪真？

人壽保險其實都有好多種，有啲係純保障，淨係touchwood過咗身先有錢賠畀屋企人，份保單本身係冇任何現金價值。有啲就係有分紅成分，可以分享保險產品嘅利潤，保障期完咗，份保單係會累積到現金價值，用嚟做人壽保障之餘，亦都希望可以有長遠嘅潛在回報。不過呢啲回報就唔係保證嘅，因為保險公司派唔派、派幾多紅利，要睇佢嘅投資表現、營運開支、賠償經驗等等。你最終收到嘅錢可能多過、亦可能少過當初畀你睇嗰份利益說明文件列出嚟嘅金額。

分紅保單「回報」高，一定好？

再講一次，分紅保單嘅現金價值有幾高，要睇保險公司派發嘅非保證利益有幾多，講到明係「非保證」，即係唔一定派得到。一般嚟講，一份分紅保單嘅非保證利益佔嘅比重高啲，佢嘅潛在回報可能會高啲，但佢嘅波幅亦都會大啲，投資風險就相對高啲。所以揀邊份分紅保單，就要考慮清楚自己嘅投保目的，例如你係想追求多啲保障，抑或多啲潛在回報，然後再按自己嘅財務狀況同承受風險嘅能力，揀一份非保證利益比重啱自己嘅產品。

未雨綢繆，及早評估保障缺口﹗

唔好恃住自己後生就忽視自己嘅保障需要，今日唔知聽日事，越早購買啱用嘅保險，就越早得到相關保障，可以減低突然出現嘅風險引致嘅財務損失。當預計嘅潛在財務損失越大，保險能夠發揮嘅作用就越大。 唔知自己可能有咩風險？不如先評估咗身故風險先啦﹗上保險業監管局專題網站，用佢哋嘅網上評估工具（https://education.ia.org.hk/tc/tool/calculator.html），跟住六個簡單步驟，就可以計算到你嘅身故風險保障缺口，了解自己嘅保險係咪足夠喇。

The post Plan好晒grad trip，撞正新工interview，點收科？ appeared first on .