徐廣林早前接受《香港演藝人協會》訪問，憶述15、16歲時，在黃大仙社區服務中心跟黃新（《香港八一至香港八六》系列中飾演「懋叔」）學戲劇，10年之後，仍未做到自己喜歡的戲劇行業，於是他去求神問卜。
「人哋話嗰間觀音廟好靈，我就走去求籤，『契娘，花仔徐廣林，好鍾意演戲，希望畀啲訊息我，等我畀啲心機做好呢個事業。』，跌咗支籤出嚟，係『畫餅充飢』，唔使睇都知搵唔到食啦，我好唔開心，將籤筒放好，喺橋頭坐咗一陣，唔好喇，再求過，又去拎起個籤筒，今次跌咗支籤出嚟，一睇，我連叫人解釋都唔敢，我話『契娘，對唔住，我走喇！』，呢支籤文係『李白水中撈月』，係咪仲衰呀，但係，越係咁，我就越想做呢行。」

一次，跟爸爸吵架，徐廣林於是離家出走，由於要搵兩餐，他惟有做巴士司機，他說：「日頭返工，夜晚排戲，做咗年幾，劇團突然間話喺荔園攞咗3個月期演舞台劇，問我去唔去，點都去啦，突然間，影視畫劇團喺利舞台要演《七十二家房客》，將呢個劇團變成職業劇團，我就問老竇，佢係唔畀我做，結果我同老竇反面，老竇3000蚊工，我唔打，走去打600蚊嘅話劇，所以我老竇好嬲我，一年後，呢個劇團解散咗，之後我一直冇工作。」

有一日，徐廣林收到舞台劇《七十二家房客》導演朱克來電，問他有沒有興趣入無綫，「我聽到有啲唔開心，因為我鍾意演舞台劇，而唔係想喺影視圈發展。後來我嘅老師良鳴叔（即是《獅子山下》飾演高就德）嘅太太說服我，『肥仔，你演20年舞台劇都冇人識你，但你喺TVB一個月，就已經有好多人識你，如果你想搞話劇就乖乖入TVB做藝員，多啲人識你先啦！」加入無綫後，徐廣林首套劇集《73》，當時夥拍劉一帆等演員，後來很多演員過檔佳視，《73》就沒有了。而徐廣林繼續留低，參演多套劇集，至90年代離開無綫，轉行做飲食行業和教拳。

The post 徐廣林年輕時為追夢求神問卜 醉心戲劇竟放棄$3000人工 appeared first on .