Tyson Yoshi（程浚彥）日前假啟德體藝館舉行《THE VILLAIN LIVE》第二場，除了瘋狂放閃賀老婆Christy生日，還「暴力對待」嘉賓林家謙，先揹住家謙全場狂奔，再將他推落「人海」玩插水，更喪笑大叫：「林家謙你唱歌真係好難聽，我想扔你落山呀！」全場爆笑歡呼，將氣氛推高。
適逢「程太」Christy正日生日，Tyson Yoshi冧爆獻唱神曲《Christy》，仲帶動全場萬人合唱生日歌！Christy坐住「王座」手持玫瑰升上台，點知Tyson即刻嫌棄面：「我明明叫導演唔好畀咪你！」最後以「趕飛機去歐洲搞婚禮」為由，錫一啖就速速送走老婆，講byebye前再搞笑叮囑：「支玫瑰拎返屋企擺好！」大放閃光彈。
嘉賓林家謙一出場就放笑彈，他笑說：「我特登騎白馬嚟，因為你海報騎黑馬，今日你要做白馬！」Tyson即刻「力王」上身，揹住家謙由台頭跑到台尾，仲要「有借有還」——要求對方做「啟德插水第二人」（第一人係上場嘉賓洪嘉豪）！見家謙面青想縮沙，Tyson即夾實佢指揮觀眾：「收電話，大家舉高雙手！」未幾即突然seed：「林家謙你唱歌真係好難聽，我想扔你落山！」家謙慘叫：「唔好抽水呀！」
上岸後家謙即還擊：「你假胸肌咋嘛。」兩人繞場時家謙又話：「點解你咁長？（指舞台）」Tyson自信爆棚：「我一向出名長！」之後扮幫細妹搲飛：「其實我唔想阿妹睇你演唱會！」一輪鬥嘴式showtime，盡顯兄弟默契。
家謙因未能去歐洲飲宴，特意送上半首Demo作新婚禮物，Tyson一聽即O嘴：「你啲歌唔係人唱㗎！」但聽10秒即刻改口：「出年出呢首！」仲邀請家謙同Serrini拍MV，點知家謙一聽到「樹妮妮」個名即耍手擰頭：「我要刪咗呢首歌！」完騷後先發現家謙的大禮原來是Tyson海報重要部位黐香蕉，寫住「祝Tyson & Christy蕉（朝）夕相對」，全場笑到標眼淚。
Tyson完騷後同Christy切蛋糕補祝生日，仲透露歐洲婚禮細節：「主題好特別，但唔講得，總之會嚇親大家！」
今次演唱會繼續發揮Tyson Yoshi暴烈式幽默，難怪網民狂Cap圖話：「林家謙到底得罪咗程老闆啲乜？」、「下次嘉賓要買定意外保險！」昨晚（7月6日）《THE VILLAIN LIVE》尾場繼續玩到癲，壓軸嘉賓張敬軒（軒仔）一登場就「報復式」玩插水，仲要玩足兩次，搞到Tyson Yoshi都頂唔順大叫：「你係咪想玩死我？！」
圖片：IG@tysonyoshi
